راولپنڈی(رپورٹنگ آن لائن) وفاقی وزیر داخلہ شیخ رشید احمد نے کہا ہے کہ اسلام آباد میں جاری او آئی سی کانفرنس کے بعد امن و امان کے حوالے سے نئی پلاننگ ترتیب دینگے، جوائنٹ میکنزم بنارہے ہیں تاکہ جڑواں شہروں میں جرائم کا خاتمہ ممکن ہوسکے،
ہفتہ کو راولپنڈی ڈسٹرکٹ ہیڈ کوارٹر ہسپتال میں گزشتہ شب اسلام آباد میں پولیس مقابلے کے دوران زخمی ہونے والے پولیس اہلکاروں کی عیادت کے بعد میڈیا سے گفتگو کرتے ہوئے شیخ رشید نے کہا کہ او آئی سی کانفرنس چالیس سال بعد پاکستان میں ہورہی ہے یہ ایک انتہائی اہم ایشو پر ہے، سیکورٹی صورتحال بہتر بنانے کیلئے پیر تک اسلام آباد میں عام تعطیل کا اعلان کیا ہے، عوام سے معذرت ہے کہ انکو او آئی سی کانفرنس کی وجہ سے تکلیف کا سامنا ہے،
انہوں نے کہا کہ اسلام آباد اور راولپنڈی دونوں شہروں کی پولیس کو مبارک باد دیتا ہوں، پولیس نے رات ایک بجے سے صبح تک ڈاکوں کا پیچھا کیا اور پولیس کے ساتھ مقابلے میں دو ڈاکو ہلاک جبکہ تین پولیس اہلکار زخمی ہوئے ہیں جنہیں بہادری دکھانے پر ایوارڈ سے نوازا جائے گا، پولیس کو مورال سپورٹ کی ضرورت ہے۔
