لاہو ر(رپورٹنگ آن لائن)امیر جماعت اسلامی پنجاب وسطی محمد جاوید قصوری نے بلوچستان میں جرگے کے ہاتھوںقتل کے المناک واقعے کی شدید الفاظ میں مذمت کرتے ہوئے کہا ہے کہ اس واقعے میں ملوث تمام افراد کو فی الفور گرفتار کرکے عبرت ناک سزا دی جائے ،قانون کی حکمرانی کو یقینی بنانا حکومت کا فرض ہوتا ہے مگر بد قسمتی سے صوبائی حکومت اس میں ناکام رہی ہے ،ایسے واقعات اسلامی تعلیمات کے منافی ہیں ، ریاستی ادارے اگر عوام الناس کو تحفظ فراہم نہیں کر سکتے تو یہ حکمرانوں کی سب سے بڑی ناکامی ہے، انہیں اقتدار میں رہنے کا کوئی حق نہیں ۔
انہوں نے ملکی صورتحال پر تشویش کا اظہار کرتے ہوئے کہا کہ سینیٹ الیکشن میں مفادات کی سیات جیت گئی ہے ۔عوام کی کسی کو کوئی فکر نہیں۔پاکستان کسی بھی قسم کے غیر سیاسی طرز عمل کا متقاضی نہیں ہو سکتا۔وقت کا تقاضا ہے کہ جمہوری اقدار کی ترویج اور مضبوط جمہوری نظام کے لئے تمام اسٹیک ہولڈر آئین و قانون کے دائرکارہ میں رہتے ہوئے کام کریں ۔ فارم 47کے جعلی مینڈیٹ پر قائم ہونے والی حکومت نا اہلوں پر مشتمل ہے۔
ملک و قوم کو انتقامی سیاست سے نجات اور معاشی استحکام کی اشد ضرورت ہے ۔ حکومت بو کھلاہٹ کا شکار ہے ۔ پی ڈی ایم ٹو کی پالیسیاں نا قابل فہم اور مایوس کن ہے۔ یوں محسوس ہوتا ہے کہ جیسے شہباز حکومت اپنے لئے خود مشکلات میں اضافہ کر رہی ہے ۔ پورے ملک میں اضطراب کی کیفیت ہے ۔انہوں نے کہا کہ جان بوجھ کر ملک و قوم کو ایسی بند گلی کی طرف دکھیلا جا رہا ہے جہاں تباہی کے سوا کچھ نہیں ، حالات پہلے ہی بہت گھمبیر اور مسائل کے ابنار لگے ہیں ۔25کروڑ عوام میں مایوسی پھیلتی چلی جا رہی ہے ۔
ہمسایہ ممالک ترقی کی دوڑ میں آگے نکل چکے اور ہمارے حکمران اپنی ناکامیوں کا ملبہ دوسروں پر ڈالنے کے لئے بہانے ڈھونڈ رہے ہیں۔ محمد جاوید قصوری نے اس حوالے سے مزید کہا کہ ملک و قوم کو ایسی قیادت کی ضرورت ہے جو ملک و قوم کو مشکلات سے نکال سکے اور ترقی کی راہ پر گامزن کر سکے ۔ملکی تاریخ گواہ ہے کہ گزشتہ 76برسوں سے ملک پر اشرافیہ قابض ہے جیسے عوام کی مشکلات کے حل سے کوئی غرض نہیں۔
