لاہور(رپورٹنگ آن لائن )بانی پی ٹی آئی عمران خان کی ہمشیرہ بہن علیمہ خان نے کہا ہے کہ جج نے میرے بیٹے شاہ ریز خان کی ضمانت کا فیصلہ سنانا تھا لیکن وہ چلے گئے، بانی پی ٹی آئی کی صحت کے حوالے سے سوشل میڈیا پر بے بنیاد خبریں پھیلائی جارہی ہیں۔
انسداد دہشتگردی کی خصوصی عدالت میں میڈیا سے گفتگو کرتے ہوئے انہوں نے کہا کہ منگل کے روزبانی پی ٹی آئی سے ملاقات ہونی تھی نہیں کرائی گئی ،بیرسٹر کی بانی پی ٹی آئی سے ملاقات ہوئی ہے ،بانی پی ٹی کا چیک اپ ان کے اپنے ڈاکٹرز کی موجودگی میں ہونا چاہیے ،ان کے ارادوں پر ہمیں یقین نہیں ،عظمی خان نے بانی پی ٹی آئی کی صحت کے لیے پوچھا کیونکہ وہ خود ڈاکٹر ہیں ۔
انہوں نے کہا کہ بانی پی ٹی آئی بالکل ٹھیک ہیں ،سوشل میڈیا پر فیک خبریں پھیلائی جا رہی ہیں ،سوشل میڈیا ،ٹی وی چینل اس طرح کی خبروں کی ہم سے تصدیق کر لیا کریں ،بانی پی ٹی آئی کوتھوڑا سا بھی کچھ ہوا تو تو سب سے پہلے ہم ان کی فیملی میڈیا کو بتانے کے لیے کھڑی ہوگی ۔بانی پی ٹی آئی کی صحت کو لے کرسنسنی پھیلا رہے ہیں جو کہ سچ نہیں ہے ۔
