رپورٹنگ آن لائن وزیراعلیٰ پنجاب مریم نواز شریف کی ہدایت پر صوبہ بھر میں غیر قانونی تجاوزات کے خلاف ایک جامع مہم کا آغاز کیا گیا ہے، جس کا مقصد سرکاری اور عوامی اراضی کو قابضین سے واگزار کرانا اور شہریوں کو بنیادی سہولیات کی فراہمی یقینی بنانا ہے۔
صوبے کے مختلف شہروں، قصبوں اور دیہی علاقوں میں ضلعی انتظامیہ، محکمہ ریونیو، بلدیاتی اداروں اور پولیس کی مشترکہ کارروائیوں سے متعدد علاقوں میں تجاوزات کا خاتمہ کیا جا چکا ہے۔ ذرائع کے مطابق لاہور، فیصل آباد، گوجرانوالہ، ملتان، راولپنڈی، بہاولپور اور دیگر شہروں میں ہزاروں کنال اراضی واگزار کرائی گئی ہے۔
تاہم حیران کن طور پر لاہور کے مضافاتی علاقے مانگا منڈی میں اب تک متعلقہ حکام نے تجاوزات کے خلاف کسی قسم کی مہم کا آغاز نہیں کیا، حالانکہ یہ علاقہ بھی غیر قانونی قبضہ مافیا کا گڑھ بن چکا ہے۔
ذرائع کا کہنا ہے کہ مانگا منڈی کے مختلف بازاروں، سڑکوں، فٹ پاتھوں اور سرکاری زمینوں پر بااثر افراد نے غیر قانونی تعمیرات اور دکانیں قائم کر رکھی ہیں۔ کئی جگہوں پر پرانی تجاوزات کے ساتھ نئی تعمیرات بھی جاری ہیں، مگر انتظامیہ خاموش تماشائی بنی ہوئی ہے۔
مانگا منڈی کی سول سوسائٹی، وکلاء، تاجر تنظیموں اور مقامی رہائشیوں نے وزیراعلیٰ پنجاب مریم نواز شریف سے اپیل کی ہے کہ دیگر علاقوں کی طرح مانگا منڈی میں بھی فوری طور پر تجاوزات کے خلاف آپریشن کا آغاز کیا جائے اور علاقہ مکینوں کو قبضہ مافیا کے رحم و کرم پر نہ چھوڑا جائے۔
مانگا منڈی کے سیاسی و سماجی رہنما محمد ریاض گجر کا کہنا تھا کہ ہم وزیر اعلیٰ کے احکامات کی حمایت کرتے ہیں، لیکن مانگا منڈی کو نظرانداز کرنا ناانصافی ہے۔ یہاں کئی سڑکیں بند ہو چکی ہیں، پیدل چلنا بھی مشکل ہو گیا ہے۔”
ادھر علاقہ مکینوں کا کہنا ہے کہ مانگا منڈی میں موجود قبضہ مافیا کو بعض بااثر سیاسی اور انتظامی شخصیات کی پشت پناہی حاصل ہے، جس کی وجہ سے متعلقہ افسران کارروائی سے گریزاں ہیں۔ بعض شہریوں نے الزام عائد کیا ہے کہ مقامی انتظامیہ کو بارہا تحریری شکایات دی گئیں، مگر کوئی پیش رفت نہ ہو سکی۔
عوامی اور سماجی حلقوں نے وزیراعلیٰ پنجاب سے مطالبہ کیا ہے کہ وہ مانگا منڈی میں تجاوزات کے خلاف مؤثر کارروائی کے لیے خصوصی ٹیم تشکیل دیں، اور ان افسران کے خلاف بھی کارروائی کریں جو اس مہم میں کوتاہی کے مرتکب ہو رہے ہیں
