بلاول بھٹو زرداری 5

بیگم نصرت بھٹو کی قربانیاں اور ان کا عزم آج بھی پاکستانی قوم، خصوصا خواتین کے لیے تحریک کا ذریعہ ہیں، بلاول بھٹو زرداری

کراچی(رپورٹنگ آن لائن)پاکستان پیپلز پارٹی کے چیئرمین بلاول بھٹو زرداری نے مادرِ جمہوریت بیگم نصرت بھٹو کو انکی برسی کے موقع پر جمہوریت، قربانی اور حوصلے کی علامت قرار دیتے ہوئے ان کی جدوجہد کو سلام پیش کیا ہے۔

میڈیا سیل بلاول ہاوس سے جاری کردہ پریس ریلیز کے مطابق، پی پی پی چیئرمین نے اپنے پیغام میں کہا کہ بیگم نصرت بھٹو نے آمریت اور جبر کے خلاف ہمیشہ بہادری سے مقابلہ کیا اور جمہوریت کی بحالی کی جدوجہد میں استقامت اور وقار کی ایسی مثال قائم کی جو تاریخ میں ہمیشہ یاد رکھی جائے گی۔ انہوں نے کہا کہ بیگم نصرت بھٹو نہ صرف قائدِ عوام شہید ذوالفقار علی بھٹو کی ثابتقدم رفیقہ اور شہید محترمہ بینظیر بھٹو کی عظیم والدہ تھیں بلکہ آزادی، انصاف اور مساوات پر یقین رکھنے والے تمام لوگوں کے لیے روشنی کا مینار ہیں۔

چیئرمین بلاول بھٹو زرداری نے کہا کہ بیگم نصرت بھٹو کی قربانیاں اور ان کا عزم آج بھی پاکستانی قوم، خصوصا خواتین کے لیے تحریک کا ذریعہ ہیں کہ وہ ناانصافی کے خلاف ڈٹ جائیں اور دیانت داری و جرات کے ساتھ ملک و قوم کی خدمت کریں۔ چیئرمین بلاول بھٹو زرداری نے مادرِ جمہوریت کے مشن کو آگے بڑھانے کے عزم کا اعادہ کیا، اس عہد کے ساتھ کہ وہ جمہوریت کے استحکام، عوام کے حقوق کے تحفظ اور ایک پرامن، ترقی پسند اور شمولیتی پاکستان کی تعمیر کے لیے جدوجہد جاری رکھیں گے۔

اس خبر پر اپنی رائے کا اظہار کریں