نئی دہلی (رپورٹنگ آن لائن)معروف بھارتی صحافی وکرانت گپتا نے دعویٰ کیا ہے کہ جنوبی افریقہ سے ہارنے کے بعد بھارت کا اپنے گھر پر غلبہ اب ختم ہوچکا ہے۔
تفصیلات کیمطابق بھارت کو ایک سال سے بھی کم عرصے میں اپنی سرزمین پر دوسری بار کسی ٹیم کے ہاتھوں وائٹ واش کا شکار ہونا پڑا ہے، جنوبی افریقہ کے خلاف سیریز میں بھارت کے کلین سوئپ ہونے کے بعد وکرانت گپتا نے نہایت افسوس کا اظہار کرتے ہوئے کہا کہ اس ہار کے پیچھے کئی سوال ہیں،وکرانت گپتا نے طنزیہ لہجے میں کہا کہ میں آپ سب کو کیا بتاؤں کہ کس کرکٹر نے کیا کیا اور کس نے کیا نہیں کیا، دوسرے ٹیسٹ کی دوسری اننگز میں پوری بھارتی ٹیم صرف 140 رنز پر آل آؤٹ ہوگئی۔
انھوں نے نشاندہی کرتے ہوئے کہا کہ پوری سیریز میں بھارت نے صرف ایک بار 200 رنز بنائے جبکہ اس سیریز میں بھارت کی طرف سے صرف دو ایسے بلے باز تھے جو نصف سنچری اسکور کرپائے۔بھارتی صحافی نے کہا کہ کبھی بھارت میں رنوں ک کان ہوتی تھی، اپنے ملک میں بھارتی بلے 500، 600 رنز بناتے تھے، یہاں پر آپ بھارت کا حال دیکھ لیجئے اور سامنے والی ٹیموں کو دیکھ لیجئے۔خیال رہے کہ پچھلے سال نومبر 2024 میں بھی بھارت کو اپنی سرزمین پر 3 ٹیسٹ میچوں کی سیریز میں نیوزی لینڈ کے ہاتھوں وائٹ واش کا شکار ہونا پڑا تھا، اب محض ایک سال سے کم عرصے میں یہی تاریخ جنوبی افریقہ نے دہرائی ہے۔
