لاہور ( رپورٹنگ آن لائن) بھارت نے مبینہ طور پر پاکستانی ڈراموں پر غیر اعلانیہ پابندی عائد کرتے ہوئے انہیں نیٹ فلکس پر بلاک کرنا شروع کر دیا۔
پاکستانی اداکار و گلوکار فرحان سعید کا کہنا ہے کہ بھارت پاکستانی کانٹینٹ کی بڑھتی ہوئی مقبولیت سے خائف ہے، اسی لیے وہاں پاکستانی ڈراموں کو محدود کیا جا رہا ہے۔
فرحان سعید کے مطابق عالمی پلیٹ فارمز پر پاکستان کو مزید توجہ دینے کی ضرورت ہے کیونکہ نئی نسل ڈرامے بڑے شوق سے دیکھتی ہے اور سرحد کے اُس پار بھی پاکستانی سیریلز کی بڑی تعداد میں تلاش کی جاتی ہے۔
واضح رہے کہ بھارتی ناظرین پاکستانی ڈراموں کو بے حد پسند کرتے ہیں اور وہاں کے نامور اداکار اور انڈسٹری سے وابستہ کئی شخصیات بھی متعدد بار پاکستانی ڈرامہ انڈسٹری کی تعریف کر چکی ہیں، بعض بھارتی فنکاروں نے تو اپنے پروڈکشن ہاؤسز کو بھی پاکستانی طرز کی کہانیوں پر کام کرنے کا مشورہ دیا ہے۔
