ڈھاکہ (رپورٹنگ آن لائن)بنگلادیش کرکٹ بورڈ ویمن کرکٹر جہاں آرا عالم کے لگائے گئے الزامات کی تحقیقات کریگا۔کرکٹ ویب سائٹ کے مطابق جہاں آرا عالم نے سابق سلیکٹر پر نامناسب رویے کے الزامات لگائے تھے اس حوالے سے سابق فاسٹ بولر نے کہاکہ سابق سلیکٹر ون ڈے ورلڈ کپ 2022 میں ان کے پاس نامناسب انداز میں آئے تھے۔
بنگلادیش کرکٹ بورڈ کی جانب سے کہا گیا کہ مقامی میڈیا میں قومی ٹیم کی ایک سابق رکن کے ٹیم سے جڑے شخص پر مِس کنڈکٹ کے الزامات پڑھے ہیں، یہ ایک حساس معاملہ ہے جس کی مکمل تحقیقات کے لیے ایک کمیٹی تشکیل دی گئی ہے۔بی سی بی کے مطابق یہ کمیٹی 15 روز میں تحقیقات مکمل کر کے سفارشات پیش کرے گی، بورڈ ایسے معاملات کو سنجیدگی سے لیتا ہے اور تحقیقات مکمل ہونے پر ایکشن بھی لیتا ہے۔واضح رہے کہ جہاں آرا عالم ان دنوں آسٹریلیا میں رہائش پذیر ہیں۔ انہوں نے اپنے انٹرویو میں ویمن ٹیم کے سلیکٹر اور منیجر پر الزامات لگائے تھے کہ ان سے فحش سوالا ت کیے گئے۔
جہاں آرا نے یہ بھی الزام لگایا ہے کہ بی سی بی آفیشلز کا بھی رویہ نامناسب رہا تھا۔ انہوں نے اس معاملے کے بارے میں بی سی بی آفیشلز کو بھی تب آگاہ کیا تھا۔جہان آرا عالم نے اس سے قبل ایک انٹرویو میں بنگلادیش ویمن ٹیم کی کپتان نگار سلطانہ پر ساتھی کھلاڑیوں کے ساتھ مار پیٹ کے الزامات لگائے تھے جسے بی سی بی نے بے بنیاد قرار دیا تھا۔جہاں آرا عالم نے 135 وائٹ بال میچز میں بنگلادیش کی نمائندگی کی ہے۔
