اسلام آباد (رپورٹنگ آن لائن) پاکستان پیپلز پارٹی کے چیئرمین بلاول بھٹو زرداری نے گلگت بلتستان کے عوام کو ڈوگرہ راج سے آزادی کی سالگرہ پر مبارکباد دیتے ہوئے کہاہے کہ گلگت بلتستان کے عوام کی یہ روح پاکستان کے اتحاد، ایمان اور استقامت کے مثالی جذبے کی عکاس ہے۔
ڈوگرہ راج سے گلگت بلتستان کی آزادی کی سالگرہ پر اپنے پیغام میں انہوںنے کہاکہ آج سے 78 سال قبل گلگت بلتستان کے غیور عوام نے تاریخ کا ایک سنہری باب رقم کیا،یکم نومبر 1947 کو گلگت بلتستان کے عوام نے جرات، استقامت اور قربانیوں سے اپنی آزادی حاصل کی۔انہوںنے کہاکہ گلگت بلتستان کے عوام کی یہ روح پاکستان کے اتحاد، ایمان اور استقامت کے مثالی جذبے کی عکاس ہے۔بلاول بھٹو زرداری نے کہاکہ قائدِ عوام اور شہید محترمہ بینظیر بھٹو کے وژن کے تحت گلگت بلتستان کی ترقی، خودمختاری اور آئینی حقوق کے لیے پرعزم ہیں۔
انہوںنے کہاکہ پیپلز پارٹی ہی وہ جماعت ہے جس نے پہلی بار گلگت بلتستان کو سیاسی شناخت اور خود مختاری دی۔ انہوںنے کہاکہ گلگت بلتستان کے عوام ہمارے شمالی سرحدی خطے کے محافظ اور پاکستان کے قومی وجود کا لازمی حصہ ہیں۔ انہوںنے کہاکہ یقین ہے کہ پوری قوم مل کر ایک مضبوط، جامع اور خوشحال پاکستان کی تعمیر کے سفر کو جاری رکھے گی۔ دریں اثناء سیکرٹری جنرل پاکستان پیپلز پارٹی ہمایوں خان نے گلگت بلتستان کی 78 ویں آزادی کے دن پر اپنے پیغام میں کہاکہ 1 نومبر 1978 کو گلگت بلتستان کی عوام نے ڈوگرہ راج سے آزادی حاصل کی، گلگت بلتستان کی عوام نے ہمیشہ ظلم و جبر کے آگے صبر کا مظاہرہ کیا ہے، گلگت بلتستان پاکستان کا ایک اہم صوبہ ہے۔
انہوںنے کہاکہ پاکستان پیپلز پارٹی نے ہمیشہ صوبے کی آزادی اور خودمختاری پر یقین رکھا ہے، گلگت بلتستان کو پاکستان پیپلز پارٹی نے ایک الگ صوبے کی حیثیت دی۔ انہوںنے کہاکہ گلگت کی بہادر عوام نے ہمیشہ اپنے حقوق کے لئے آواز بلند رکھی، شہید محترمہ بینظیر بھٹو اور شہید ذالفقار علی بھٹو نے پاکستان کے ہار صوبے کی ترقی کے لئے خواب دیکھا۔ پاکستان پیپلز پارٹی کے مرکزی سیکرٹری اطلاعات ندیم افضل چن نے گلگت بلتستان کے 78ویں یومِ آزادی پر اپنے پیغام میں کہاکہ گلگت بلتستان پاکستان کا فخر ہے، گلگت بلتستان کے عوام نے آزادی کی جدوجہد میں لازوال قربانیاں دیں۔ انہوںنے کہاکہ پیپلز پارٹی گلگت بلتستان کی ترقی اور خوشحالی کے لیے پرعزم ہے، اتحاد و یکجہتی قومی ترقی کی ضمانت ہے۔
