شہباز اکمل جندران۔۔۔
صوبائی حکومت نے گریڈ 19 کی صالحہ سعید کو گریڈ 20 میں ڈائیریکٹر جنرل ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب تعینات کرنے کا نوٹیفکیشن جاری کر دیا ہے۔
جبکہ پہلے ڈی جی کے عہدے پر تعینات گریڈ 20 کے سینئیر افسر مسعود الحق کو ایڈمنسٹریٹو ڈیپارٹمنٹ رپورٹ کرنے کو کہا گیا ہے۔
مسعود الحق ایکسائز ٹیکسیشن اینڈ نارکوٹکس کنٹرول ڈیپارٹمنٹ سے تعلق رکھتے ہیں اور انتہائی ایماندار، قابل اور محنتی افسر کے طورپر جانے جاتے ہیں۔
یہی نہیں بلکہ مسعود الحق، اکرم اشرف گوندل کے بعد محکمے کے دوسرے افسر ہیں جنہیں ڈائیریکٹر جنرل کے عہدے پر تعینات کیا گیا تھا۔
ایکسائز ٹیکسیشن اینڈ نارکوٹکس کنٹرول ڈیپارٹمنٹ بیورو کریسی کے لیئے ہمیشہ سے کشش کا باعث رہا ہے۔اور ہر دور میں پراونشل و فیڈرل سروس کے افسروں کی کوشش رہی ہے کہ ایکسائز ڈیپارٹمنٹ کے ڈی جی بنیں۔
30 ستمبر 2020 کو دی جی ایکسائز تعینات ہونے والی خاتون افسر صالحہ سعید اسسٹنٹ کمشنر کینٹ۔ڈپٹی کمشنر حافظ آباد اور ڈپٹی کمشنر لاہور کے طورپر فرائض انجام دے چکی ہیں۔
ذرائع کے مطابق لاہور میں ایک سال سے بھی کم عرصے کے لئے تعینات رہنے والی صالحہ سعید کو ڈینگی کی وبا پر قابو نہ پانے کی پاداش میں عہدے سے الگ کردیا گیا تھا۔اور ان کی تعیناتی کے دوران 2019 میں ڈینگی نے لاہور میں پنجے گاڑھنا شروع کر دیا تھا۔ذرائع کا یہ بھی کہنا ہے کہ صالحہ سعید لاہور میں گندگی اور ویسٹ پر قابو پانے اور تجاوزات کو ہٹانے میں بھی ناکام رہی تھیں۔جس کی وجہ سے حکومت نے انہیں ہٹا دیا تھا۔
تاہم اب انہیں ایک بار پھر سے پرکشش عہدے پر تعینات کرنے کا نوٹیفکیشن جاری کر دیا گیا ہے۔اور ایکسائز ڈیپارٹمنٹ کی کارگردگی کو مسعود الحق سے آگے لے کر چلنا ان کے لئے چیلنج ہوگا
