اسلام آباد (رپورٹنگ آن لائن)قائم مقام صدر سید یوسف رضا گیلانی نے بابا گرو نانک دیو جی کی 556 ویں سالگرہ کے پر مسرت موقع پر پاکستان اور دنیا بھر میں مقیم سکھ برادری کو دلی مبارکباد دیتے ہوئے کہا ہے کہ بابا گرو نانک دیو جی کا پیغام انسانیت، بین المذاہب ہم آہنگی، امن اور رواداری کا روشن چراغ ہے۔ ان کی تعلیمات انسانیت کو باہمی احترام اور محبت کی راہ دکھاتی ہیں اور اسے نفرت، تعصب اور تقسیم سے دور لے جاتی ہیں۔
ایوان صدر کے میڈیا ونگ سے جاری بیان کے مطابق ان خیالات کا اظہار انہوں نے بابا گرو نانک دیو جی کی 556 ویں سالگرہ کے موقع پر اپنے پیغام میں کیا۔قائم مقام صدر نے اطمینان کا اظہار کیا کہ پاکستان، ننکانہ صاحب میں بابا گرو نانک دیو جی کی جائے پیدائش سمیت تمام مقدس مقامات کی حفاظت اور نگہداشت کو ایک مقدس ذمہ داری سمجھتا ہے۔
انہوں نے کہا کہ زائرین کو بہترین سہولیات فراہم کرنے کے لیے مسلسل کوششیں کی جارہی ہیں۔ انہوں نے مزید کہا کہ پاکستان کا آئین اور ریاست تمام اقلیتوں کے لیے یکساں حقوق کی مکمل ضمانت دیتے ہیں جبکہ قومی یکجہتی، بین المذاہب ہم آہنگی اور رواداری کا فروغ ہمارے جمہوری اقدار کی بنیاد ہیں۔
