لاہور(رپورٹنگ آن لائن)پرنسپل پوسٹ گریجویٹ میڈیکل انسٹی ٹیوٹ پروفیسر ڈاکٹر سردار محمد الفرید ظفر نے کہاکہ وزیر اعلیٰ پنجاب سردار عثمان بزدار اور وزیر صحت ڈاکٹر یاسمین راشد کی ہدایت پر انسداد ٹائیفائیڈ مہم نئی نسل کی صحت کی ضامن ہو گی اور پاکستان خطے کا پہلا ملک بن گیاہے جس میں عالمی ادارہ صحت کی گائیڈلائنز کے مطابق ٹائیفائیڈ ویکسین متعارف کروائی جا چکی ہے۔
انہوں نے کہا کہ یکم تا 15فروری تک جاری رہنے والی ٹائیفائیڈ حفاظتی ٹیکوں کی مہم کی کامیابی کیلئے نرسنگ کالج جنرل ہسپتال کی طالبات سمیت 100تربیت یافتہ پیرا میڈکس حصہ لیں گے جو محکمہ صحت کے تیار کردہ پلان کی روشنی میں ایمرجنسی اور آؤٹ ڈور میں قائم کاؤنٹر زکے علاوہ نشتر ٹاؤن کی مختلف یونین کونسلز میں بچوں کو گھر گھر جا کر انجیکشن لگائیں گے۔ انہوں نے انتظامیہ کو ہدایت کی کہ وہ اس بات کو یقینی بنا ئیں کہ والدین کے ساتھ آنے والا کوئی بچہ ٹائیفائیڈ ویکسین سے محروم نہ رہے۔جائزہ اجلاس میں میڈیکل سپرنٹنڈنٹ ڈاکٹر عبدالرزاق، پرنسپل نرسنگ کالج اظہرہ سلطانہ،ڈاکٹر جعفر شاہ،ڈاکٹر عبدالعزیز اور انچارج ای پی آئی شنیلہ کومل و دیگر بھی موجود تھے۔
میڈیا سے گفتگو میں پرنسپل پی جی ایم آئی پروفیسر الفرید ظفر نے کہا کہ اس مہم کے دوران 9ماہ سے 15سال تک عمر کے بچوں کو ٹائیفائیڈ ویکسین لگائی جائیں گی اور آئندہ سال سے بچوں کے پیدائشی ٹیکوں کے کورس میں شامل کر دی جائے گی۔پاکستان کو بیماریوں سے پاک کرنے کیلئے صحت عامہ بارے عوامی سطح پرشعور اجاگر کرنا بھی ضروری ہے تاکہ لوگ حکومتی سطح پر مختلف بیماریوں کی حفاظتی ویکسین مہم سے بھرپور استفادہ کرتے ہوئے نو نہالوں کو ویکسین لگوائیں۔ پروفیسر الفرید ظفر نے کہا کہ حکومت ہر سال کڑوروں روپے بچوں اور خواتین کے حفاظتی پروگرام پر خرچ کرتی ہے لیکن ان تمام مہمات کی کامیابی والدین اور عوام کے بھرپور تعاون سے مشروط ہے۔ انسداد پولیو کی مہم ہو یا ٹائیفائیڈ کے انجیکشن تمام والدین کا فرض ہے کہ وہ اپنے بچوں کا بنیادی حق سمجھتے ہوئے یہ ٹیکے لگوائیں۔
پرنسپل امیر الدین میڈیکل کالج پروفیسر الفرید ظفر نے مزید کہا کہ ترقی یافتہ ممالک میں لوگ اپنے بچوں کو حفاظتی ٹیکے لگوانے کیلئے حکومت کی جانب سے مقرر کردہ سینٹر پر لے کر جاتے ہیں اور بعض ملکوں میں حفاظتی ٹیکے نہ لگوانے والے والدین کو قانونی کاروائی کا سامنا کرنا پڑتا ہے لیکن پاکستان میں حکومت کی تمام تر کوششوں کے باوجود بہت سے طبقات بچوں کے حفاظتی ٹیکے لگوانے کی حوصلہ افزائی نہیں کرتے جو اخلاقی، مذہبی اور قومی ذمہ داریوں کے منافی ہے۔
پروفیسر الفرید ظفر نے علمائے کرام، ذرائع ابلاغ کے نمائندوں، سماجی تنظیموں اور طب سے وابستہ افراد سے اپیل کی کہ وہ ٹائیفائیڈ سے بچاؤ کے ٹیکے اور بچوں کو پولیو جیسی مرض سے بچانے کیلئے اپنا اپنا کردار ادا کریں اور ان ایسی مہم کو کامیاب بنائیں۔
