واشنگٹن (رپورٹنگ آن لائن) امریکہ میں متعین پاکستان کے سفیر ڈاکٹر اسد مجید خان نے کہا ہے کہ پاکستان ایک ابھرتی ہوئی مارکیٹ ہے، امریکی کمپنیوں کےلئے پاکستان میں زراعت، سیاحت اور انفارمیشن ٹیکنالوجی سمیت متعدد شعبوں میں سرمایہ کاری کے وسیع مواقع موجود ہیں،
انہوں نے ان خیالات کا اظہار گزشتہ روز اٹلانٹک کونسل کے زیرا ہتمام پاک امریکہ تعلقات اور ان کا مستقبل کے موضوع پر منعقدہ ویبینار سے خطاب کرتے ہوئے کیا ، ویپینار میں اٹلانٹک کونسل جنوبی ایشیا کے سینئر فیلوز کیمرون منٹر اور صفیہ غوری احمد بھی شریک ہوئے، ویپینار سے خطاب کرتے ہوئے اسد مجید خان نے کہا کہ پاکستان میں کاروباردوست پالیسیوں سمیت بیرونی سرمایہ کاروں کو خصوصی مراعات دی جارہی ہیں، پاکستان ایک ابھرتی ہوئی مارکیٹ ہے، امریکی کمپنیوں کےلئے زراعت، سیاحت اور انفارمیشن ٹیکنالوجی سمیت متعدد شعبوں میں سرمایہ کاری کے وسیع مواقع موجود ہیں،موجودہ حکومت کی مثبت پالیسیوں اور معاشی سرمایہ کاری کے سبب دنیا بھر سے موثر کاروباری کمپنیاں پاکستان میں سرمایہ کاری کےلئے دلچسپی کا اظہار کر رہی ہیں،
ڈاکٹر اسد مجید خان نے امریکی کمپنیوں کو پاکستان میں خصوصی معاشی زونز میں سرمایہ کاری کی دعوت دیتے ہوئے کہا کہ پاکستان پورے خطے میں امن و استحکام چاہتا ہے،ہم چاہتے ہیں کہ افغان امن مذاکرات کامیابی سے ہمکنار ہوں اور اپنے منطقی انجام کو پہنچیں، امریکہ میں متعین پاکستانی سفیر کا کہنا تھا کہ بھارت نے کبھی بھی افغانستان میں امن کے عمل کی حمایت نہیں کی۔
