واشنگٹن (رپورٹنگ آن لا ئن ) امریکہ میں اسکول کھولنے کے معاملے پر وائٹ ہاوس اور صحت کے اداروں میں اختلافات بدستور برقرار ہیں، وائٹ ہاوس کا کہنا ہے کہ ڈاکٹروں کو وبا پر توجہ مرکوز رکھنے دی جائے۔
غیر ملکی خبر رساں ادارے کے مطابق کورونا وائرس کی موجودہ صورتحال کے پیش نظر امریکہ میں اسکول کھولنے کے معاملہ پر ٹرمپ انتظامیہ تنازع کا شکار ہے، اسکولوں کے کھولنے پر وائٹ ہاوس اور صحت کے اداروں میں شدید اختلافات تاحال برقرار ہیں۔
وائٹ ہاوس نے ڈائریکٹر سی ڈی سی کو کانگریس کی سماعت میں پیشی سے روک دیا، ڈاکٹر رابرٹ فیلڈ کو لیبر و ایجوکیشن ہاوس کمیٹی نے طلب کیا تھا، اجلاس اسکول دوبارہ کھولنے کے حوالے سے طلب کیا گیا ہے۔امریکی میڈیا کے مطابق صدر ٹرمپ نے ٹوئٹ کیا تھا کہ اسکول کھولنے کے لئے بنائی جانے والی گائیڈ لائنز بہت سخت اور مہنگی ہیں۔
اس حوالے سے وائٹ ہاوس کا موقف ہے کہ ڈاکٹر ریڈ فیلڈ تین ماہ میں 4مرتبہ کمیٹی کے سامنے پیش ہوچکے ہیں، ڈاکٹروں کو وبا پر توجہ مرکوز رکھنے دیں۔
ترجمان کمیٹی کا کہنا ہے کہ اسکول کھولنے کیلئے سی ڈی سی کا موقف سننا انتہائی ضروری ہے، کمیٹی کے سامنے سی ڈی سی کا کوئی بھی اہلکار پیش ہوسکتا ہے۔
