اسلام آباد(رپورٹنگ آن لائن)الیکشن کمیشن آف پاکستان کے پنجاب اور خیبر پختونخوا کے ممبران کے تقرر پر حکومت اور اپوزیشن میں ڈیڈلاک ہو گیا۔ حکومت نے ای سی پی کے پنجاب کے ممبر کیلئے اپوزیشن کا نام جبکہ خیبر پختونخوا کے ممبر کیلئے حکومتی نام دینے کی پیشکش مسترد کردی ۔
تفصیلات کے مطابق حکومت اور اپوزیشن ہے درمیان الیکشن کمیشن کے ممبران کی تعیناتی پر ڈیڈ لاک کا انکشاف ہوا ہے۔مسلم لیگ (ن)پنجاب کے صدر رانا ثناء اللہ کے مطابق وفاقی وزیر اسد عمر اور سعد رفیق کے درمیان ملاقات ہوئی تھی ،ملاقات کے بعد الیکشن کمیشن کے پنجاب اور خیبر پختونخوا کے ممبران کیلئے 2،2 نام شارٹ لسٹ ہوئے تھے ۔
رانا ثناء اللہ کے مطابق جس کے بعد ہم نے پی ٹی آئی کو کہا کہ آپ پنجاب میں ہمارا نام پیش کریں ،آپ کے پی کے میں اپنا نام پیش کریں کیونکہ آپکی کے پی کے میں اکثریت ہے،وزیر اطلاعات فواد چوہدری نہیں مانے اور انھوں نے کہا کہ نہیں آپ ہمیں پنجاب دے دیں، اس کے بعد کوئی پیش رفت نہیں ہوئی معاملہ ڈیڈلاک کا شکار ہے۔
