لاہور(رپورٹنگ آن لائن )انسداد دہشتگردی کی خصوصی عدالت نے پاکستان تحریک انصاف کے مرکزی رہنمائوںمسرت جمشید چیمہ اور جمشید اقبال چیمہ کی 9 مئی کے مقدمات میں عبور ی ضمانت میں12 دسمبر تک توسیع کر دی ۔
انسداد دہشتگردی عدالت کے ایڈمن جج منظر علی گل نے 9 مئی جلا ئوگھیرا ئوسمیت 8 مقدمات میں پی ٹی آئی رہنما مسرت جمشید چیمہ اور جمشید اقبال چیمہ کی عبوری ضمانتوں کی درخواست پر سماعت کی ۔جمشید اقبال چیمہ عبوری ضمانت کی مدت ختم ہونے پر عدالت میں پیش ہوئے جبکہ مسرت جمشید چیمہ کی جانب سے طبیعت کی خرابی کے باعث ایک روزہ حاضری سے استثنیٰ کی درخواست دائر کی گئی جسے عدالت نے منظور کر لیا۔
عدالت نے دونوں رہنمائوں کی عبوری ضمانت میں 12 دسمبر تک توسیع کر دی اور حکم دیا کہ مسرت جمشید چیمہ کی حد تک تفتیش مکمل کی جائے، جمشید اقبال چیمہ کی تفتیش مکمل ہو چکی ہے، آئندہ سماعت پر ملزمان کے وکلا ء ضمانتوں پر دلائل پیش کریں گے۔
