اسلام آباد(رپورٹنگ آن لائن)سپریم کورٹ آف پاکستان نے پنجاب حکومت کی جسمانی ریمانڈ کی اپیل پر سابق گورنر پنجاب عمر سرفراز چیمہ کو نوٹس جاری کر دیا۔
پیرکوچیف جسٹس پاکستان یحییٰ آفریدی کی سربراہی میں 3 رکنی بینچ نے 9 مئی کے مقدمات میں سابق گورنر پنجاب عمر سرفراز چیمہ کے جسمانی ریمانڈ سے متعلق اپیل پر سماعت کی۔سپریم کورٹ نے عمر سرفراز چیمہ کو نوٹس کوٹ لکھپت جیل انتظامیہ کے توسط سے جاری کیا۔
دوران سماعت پراسیکیوٹر نے کہاکہ عمر سرفراز چیمہ سے اسلحہ برآمد کرنا ہے۔چیف جسٹس یحییٰ آفریدی نے استفسار کیا کی عمر سرفراز چیمہ ابھی کہاں ہیں؟ ۔پراسیکیوٹر ذوالفقار نقوی نے جواب دیا کہ وہ کوٹ لکھپت جیل میں ہیں۔چیف جسٹس یحییٰ آفریدی نے کہا کہ ملزم جیل میں ہیں تو تفتیش کر لیں، کیا مسئلہ ہے؟۔
پراسیکیوٹر نے جواب دیا کہ برآمدگی کیلئے جسمانی ریمانڈ ضروری ہے جو ہائی کورٹ نے نہیں دیا۔سپریم کورٹ نے پنجاب حکومت کی اپیل پر عمر سرفراز چیمہ کو نوٹس جاری کر تے ہوئے کیس کی سماعت جمعرات تک ملتوی کر دی۔
