اسلام آباد (رپورٹنگ آن لائن) صدرِ مملکت آصف علی زرداری نے کہا ہے کہ 8 اکتوبر زلزلے کے بعد قوم زیادہ مضبوط اور متحد ہو کر تابناک مستقبل کی طرف بڑھی۔
8 اکتوبر 2005 کے تباہ کن زلزلے کی 20ویں برسی پر صدرِ مملکت آصف علی زرداری نے اپنے پیغام میں جاں بحق افراد کو خراج عقیدت اور متاثرین کے ساتھ یکجہتی کا اظہار کیا ہے۔
صدر مملکت نے کہا ہے کہ ہم اُن تمام لوگوں کو خراجِ تحسین پیش کرتے ہیں جنہوں نے قدرتی آفات کا سامنا یکجہتی کے ساتھ کیا، ہماری قوم زیادہ مضبوط، زیادہ متحد اور زیادہ پُرعزم ہو کر ایک تابناک مستقبل کی تعمیر کی طرف بڑھی ہے۔
انہوں نے کہا ہے کہ اصل طاقت مشکلات سے بچنے میں نہیں بلکہ ایمان، اتحاد اور جدت کے ساتھ اُنہیں عبور کرنے میں ہے۔
آصف زرداری نے اس موقع پر رواں سال آنے والے تباہ کن مون سون سیلاب کا بھی ذکر کیا جس میں بڑی تعداد میں لوگ بے گھر ہوئے اور زراعت، بنیادی ڈھانچے، خدمات اور روزگار کے شعبوں میں بھاری نقصانات ریکارڈ کیے گئے۔
ان کا کہنا تھا کہ پاکستان کا ڈیزاسٹر مینجمنٹ فریم ورک اب خطے کے بہترین ماڈلز میں شمار ہوتا ہے تاہم بار بار آنے والی آفات یہ تقاضا کرتی ہیں کہ ہم اپنی تیاری کو مزید مضبوط کریں، پائیدار ترقی کو فروغ دیں اور معاشرے کے تمام طبقات کو اس عمل میں شریک کریں۔
صدر مملکت نے تمام سٹیک ہولڈرز پر زور دیا کہ وہ باہمی تعاون سے آفات کے اثرات کو کم کرنے، مشترکہ تیاری کو بڑھانے اور ضرورت مندوں کے تحفظ کے لیے کردار ادا کریں۔
آخر میں صدرِ مملکت آصف علی زرداری نے دعا کی کہ اللہ تعالیٰ ہمیں ایک زیادہ محفوظ، زیادہ مضبوط اور زیادہ مستحکم پاکستان بنانے میں اپنی رہنمائی عطا فرمائے۔ آمین۔
علاوہ ازیں وفاقی وزیر داخلہ محسن نقوی نے قومی یومِ استقامت (8 اکتوبر) کے موقع پر اپنے پیغام میں کہا ہے کہ 2005 کے تباہ کن زلزلے کی یاد آج بھی قوم کے دلوں میں تازہ ہے۔
محسن نقوی نے کہا کہ 8 اکتوبر کا دن ہمیں یاد دلاتا ہے کہ قدرتی آفات کے سامنے جھکنے کے بجائے پاکستانی قوم نے صبر، ہمت اور یکجہتی سے مقابلہ کیا۔
انہوں نے کہا ہے کہ اس المناک سانحے میں ہزاروں قیمتی جانیں ضائع ہوئیں اور لاکھوں افراد بے گھر ہوئے مگر قوم نے جس جذبے اور عزم سے امدادی سرگرمیوں میں حصہ لیا وہ تاریخ کا روشن باب ہے۔
وفاقی وزیر داخلہ نے جاں بحق ہونے والے افراد کو خراجِ عقیدت پیش کرتے ہوئے کہا کہ ان کی قربانیاں ہمیں انسانیت، خدمت اور ایثار کا سبق دیتی ہیں۔
محسن نقوی نے ریسکیو اداروں، افواجِ پاکستان، سول سوسائٹی اور بین الاقوامی امدادی تنظیموں کا شکریہ ادا کیا جنہوں نے متاثرین کی بحالی میں کلیدی کردار ادا کیا۔
انہوں نے اس عزم کا اعادہ کیا کہ حکومت قدرتی آفات سے نمٹنے کے لیے جدید نظام اور فوری ردعمل کی صلاحیت کو مزید مضبوط بنائے گی تاکہ مستقبل میں کسی بھی سانحے کا بہتر طور پر مقابلہ کیا جا سکے۔
