جوہانسبرگ (رپورٹنگ آن لائن)جنوبی افریقا کے کپتان ویان ملڈر نے 400 رنز کا ریکارڈ نہ توڑنے پر لارا کی کہی ہوئی بات سے پردہ اٹھادیا۔
جنوبی افریقی کرکٹر ویان ملڈر نے کہا کہ 400 رنز نہ بنانیپر لارا نے کہا کہ مجھے عالمی ریکارڈ بنانے کی کوشش کرنی چاہیے تھی کیونکہ ریکارڈ ٹوٹنے کے لیے بنتے ہیں، اگر پھر کبھی موقع ملے تو مجھ سے زیادہ رنز کرنا۔انہوں نے کہا کہ یہ برائن لارا کی دلچسپ رائے ہے لیکن میں سمجھتا ہوں کہ میں نے درست کیا، میں گیم کی عزت کرتا ہوں اور یہ میرے لیے سب سے اہم ہے۔
واضح رہے کہ ویان ملڈر نے زمبابوے کے خلاف 367 رنز کے انفرادی اسکور پر اننگز اس وقت ڈیکلیئر کر دی تھی جب وہ لارا کے ٹیسٹ میں بنائے گئے تاریخی 400 رنز کے ورلڈ ریکارڈ سے صرف 33 رنز دور تھے۔ برائن لارا نے 21 سال قبل سال 2004 میں اینٹیگوا میں انگلینڈ کے خلاف کھیلتے ہوئے 400 رنز اسکور کیے تھے اور ان کا یہ ریکارڈ آج تک قائم ہے۔
