لاہور( رپورٹنگ آن لائن)سابق وفاقی وزیر خرم دستگیر خان نے انکشاف کیا ہے کہ 27ویں آئینی ترمیم کا ابتدائی مسودہ تیار ہوچکا ہے اور اس پر مختلف سیاسی جماعتوں سے مشاورت جاری ہے،حکومت کی کوشش ہے کہ اس اہم آئینی ترمیم کا مسودہ آئندہ جمعے کے روز سینیٹ میں پیش کیا جائے۔ایک انٹرویو میں انہوں نے کہاکہ حکومت تمام سیاسی جماعتوں کو اعتماد میں لے کر ترمیم پیش کرنے کی خواہاں ہے، حتی کہ تحریکِ انصاف سے بھی رابطے کیے جا رہے ہیں تاکہ ترمیم وسیع تر اتفاقِ رائے سے منظور ہو۔
قومی اسمبلی میں حکومت کو کوئی دشواری نہیں ہوگی تاہم سینیٹ میں منظوری کے لیے سیاسی مشاورت کا عمل جاری ہے۔انہوں نے یہ بھی تصدیق کی کہ حتمی مسودہ تیار ہونے کے بعد مسلم لیگ (ن)کے قائد نواز شریف سے بھی مشاورت کی جائے گی، حکومت کی خواہش ہے کہ ترمیم سیاسی اتفاقِ رائے کے ساتھ منظور ہو تاکہ اسے پائیدار حیثیت حاصل ہو۔خرم دستگیر نے کہا کہ آئین پاکستان ایک زندہ دستاویز ہے جس میں وقت کے ساتھ تبدیلیاں ناگزیر ہیں اسی لیے یہ ترمیم بھی کوئی غیر معمولی بات نہیں بلکہ ملکی نظامِ حکومت کو بہتر بنانے کی ایک آئینی ضرورت ہے۔
انہوں نے بتایا کہ اس مجوزہ ترمیم کا بنیادی مقصد گورننس کے مسائل کو حل کرنا اور وفاقی نظام کو زیادہ موثربنانا ہے۔انہوں نے وضاحت کی کہ اس ترمیم کے تحت صوبوں کے اختیارات میں کسی قسم کی کمی نہیں کی جارہی بلکہ صوبائی خودمختاری برقرار رہے گی تاہم مالیاتی نظام میں اصلاحات تجویز کی گئی ہیں تاکہ وفاق پر قرضوں کا بڑھتا ہوا بوجھ کم ہوسکے۔ وفاقی حکومت کی یہ تجویز بھی زیرِ غور ہے کہ گلگت بلتستان، آزاد جموں و کشمیر اور سابق فاٹا کو این ایف سی ایوارڈ کا باقاعدہ حصہ بنایا جائے تاکہ ان علاقوں کے مالیاتی حقوق کو آئینی تحفظ حاصل ہو۔
انہوںنے بتایا کہ ترمیم میں اہم پہلو آئینی عدالت کے قیام سے متعلق ہے،آئینی عدالت کا تصور نیا نہیں بلکہ 2006 کے میثاقِ جمہوریت میں پاکستان مسلم لیگ (ن)اور پاکستان پیپلز پارٹی کے درمیان طے پایا تھا۔خرم دستگیر کے مطابق آئینی عدالت کے قیام سے سپریم کورٹ پر مقدمات کا بوجھ کم ہوگا، کیونکہ آئینی نوعیت کے مقدمات ایک علیحدہ عدالت میں سنے جائیں گے جبکہ عوامی نوعیت کے مقدمات سپریم کورٹ میں بدستور جاری رہیں گے۔
خرم دستگیر خان نے بتایا کہ تعلیمی شعبے میں بھی ایک بنیادی قومی نصاب متعارف کرانے کی تجویز زیرِ غور ہے تاکہ پورے ملک میں تعلیم کے معیار میں ہم آہنگی پیدا کی جاسکے تاہم صوبوں کو اپنے نصاب تیار کرنے کا اختیار برقرار رہے گا۔یہ ضروری ہے کہ ہر طالب علم کو کچھ بنیادی قومی مضامین ضرور پڑھائے جائیں جن سے پاکستان کی وحدت اور آئینی شعور کو فروغ ملے۔
بلدیاتی نظام کے بارے میں گفتگو کرتے ہوئے خرم دستگیر نے کہا کہ حکومت کی کوشش ہے کہ مقامی حکومتوں کے ڈھانچے کو آئینی بنیاد فراہم کی جائے تاکہ عوام کو ان کی دہلیز پر سہولتیں مل سکیں تاہم یہ اختیار صوبوں ہی کے پاس رہے گا کہ وہ اپنے حالات کے مطابق بلدیاتی نظام نافذ کریں۔انہوں نے واضح کیا کہ آئینی ترمیم کا مقصد صوبوں کے اختیارات کم کرنا نہیں بلکہ ان کے مالیاتی حقوق کو منظم کرنا ہے۔
جب ہم آزاد کشمیر، گلگت بلتستان اور فاٹا کے لوگوں کو قومی مالیاتی نظام کا حصہ بنائیں گے تو یہ پورے ملک کی مضبوطی کا باعث ہوگا۔خرم دستگیر کے مطابق اس وقت پاکستان معاشی اور سیاسی لحاظ سے نسبتاًمستحکم ہے اس لیے حکومت چاہتی ہے کہ جو آئینی و انتظامی معاملات طویل عرصے سے زیرِ التوا ہیں انہیں جلد از جلد حل کیا جائے تاکہ نظامِ حکومت بہتر انداز میں چل سکے۔
