کراچی(رپورٹنگ آن لائن)پاکستان تحریک انصاف سندھ کے صدر حلیم عادل شیخ نے ایک اہم بیان میں کہا ہے کہ چیئرمین عمران خان کی 843 دن سے جاری غیر قانونی اور غیر آئینی قید انسانی حقوق کی سنگین ترین خلاف ورزی ہے۔
انہوں نے کہا کہ قوم کے مقبول ترین اور عظیم لیڈر کو مکمل تنہائی میں رکھنا بدترین سیاسی انتقام ہے، جبکہ ان سے ملاقاتوں کو روکنا آئین، قانون اور عدالتی احکامات کی کھلی خلاف ورزی ہے۔حلیم عادل شیخ نے کہا کہ بشری بی بی سمیت ناحق قید کیے گئے سیاسی رہنماں کو بنیادی طبی سہولیات سے محروم رکھنا انسانی حقوق کی بدترین پامالی ہے۔ انہوں نے کہا کہ 9 مئی کے مقدمات کو انسدادِ دہشت گردی کی عدالتوں میں بھیجنا عدلیہ پر دبا ڈالنے اور سیاسی انجینئرنگ کو آگے بڑھانے کی منصوبہ بندی ہے۔
ان کے مطابق حکومت عدالتی احکامات پامال کرکے نہ صرف اداروں کی ساکھ مجروح کر رہی ہے بلکہ انصاف کے پورے نظام کو نقصان پہنچا رہی ہے۔پی ٹی آئی سندھ کے صدر نے کہا کہ آئی ایم ایف کی حالیہ رپورٹ حکومت کی مالی بدعنوانی اور بدترین انتظامی ناکامی کا کھلا ثبوت ہے جس میں 5300 ارب روپے کی کرپشن واضح طور پر سامنے آچکی ہے۔ انہوں نے کہا کہ معیشت کو تباہی کے کنارے پر پہنچانے اور 14 لاکھ نوجوانوں کو بے روزگار کرنے کی ذمہ دار وہ فارم 47 کی جعلی حکومت ہے جس نے کسی شعبے میں بہتری کا کوئی لائحہ عمل پیش نہیں کیا۔
انہوں نے مزید کہا کہ 12.6 فیصد نوجوانوں کی بے روزگاری موجودہ حکمرانوں کی ناقص پالیسیوں کا نتیجہ ہے۔اپنے بیان میں انہوں نے 27ویں آئینی ترمیم کو عدلیہ پر قبضے کی سنگین سازش قرار دیا اور کہا کہ وفاقی آئینی عدالت کے اختیارات میں ابہام جان بوجھ کر رکھا گیا ہے تاکہ عدلیہ کو کمزور کیا جا سکے اور حکمران اپنی مرضی کے فیصلے حاصل کر سکیں۔انہوں نے کہا کہ سیاسی مخالفین کو دبانے کے چکر میں حکومت نے قومی سلامتی تک دا پر لگا دی ہے اور ملک کو شدید عدم استحکام میں دھکیل دیا ہے۔ حلیم عادل شیخ نے کہا کہ 26 نومبر کے شہدا کی عظیم قربانیاں تحریک انصاف کی جدوجہد کی بنیاد ہیں، جبکہ پی ٹی آئی کے پرامن کارکنوں پر مسلسل ریاستی تشدد تاریخ کا سیاہ ترین باب ہے، جسے کبھی معاف نہیں کیا جائے گا۔
انہوں نے چینی کے مصنوعی بحران کو حکومتی کرپشن اور مالی بدانتظامی کا نتیجہ قرار دیتے ہوئے کہا کہ چینی کی قیمت 215 روپے فی کلو تک پہنچ گئی ہے اور حکومت خاموش تماشائی بنی ہوئی ہے، جبکہ عوام دونوں ہاتھوں سے لوٹے جا رہے ہیں۔ مہنگائی نے عام عوام سے دو وقت کی روٹی تک چھین لی ہے۔ حلیم عادل شیخ نے کہا کہ سیاسی استحکام کے بغیر نہ معیشت بحال ہو سکتی ہے اور نہ ملک میں امن آسکتا ہے۔ واحد راستہ صاف، شفاف اور فوری انتخابات ہیں تاکہ عوامی نمائندگی کے ذریعے ملک کو بحرانوں سے نکالا جا سکے۔ انہوں نے کہا کہ عوامی مینڈیٹ چوری کرکے مسلط کی گئی حکومت نے ملک کو گہرے سیاسی، معاشی اور آئینی بحران میں دھکیل دیا ہے۔
