لاہور(رپورٹنگ آن لائن)معاون خصوصی وزیرِ اعلی پنجاب برائے اطلاعات و ترجمان حکومت پنجاب حسان خاور نے نئے سال کی مبارکباد دیتے ہوئے اس امید کا اظہار کیا کہ 2022پاکستان کی تعمیر و ترقی کے لیے ایک بہترین سال ہو گا اپنے ایک بیان میں انہوں نے کہا کہ یہ یاد رکھنا بہت ضروری ہے کہ 2021 پنجاب کی ترقی کا سال تھا، 2021 میں پاکستان کورونا سے باہر آیا، معیشت کا پہیہ چلا جبکہ ہماری پالیسی زیادہ سے زیادہ لوگوں کو ویکسینیٹ کرنا تھی،
وزیر اعلی پنجاب کی ہدایت پر محکمہ صحت نے تیزی سے صوبے میں ویکسی نیشن مہم چلائی، جنوری 2021میں 5 ارب کی لاگت سے لاہور شیخوپورہ دو رویہ روڈ کا سنگِ بنیاد رکھا گیا،حسان خاور نے کہا کہ اس کے ساتھ پاکستان میں پہلی دفعہ ٹائیفائڈ کی ویکسی نیشن متعارف کرائی گئی،ترجمان حکومت پنجاب نے کہا کہ اس کے ساتھ لاہور میں دور رس نتائج کے حامل سنٹرل بزنس ڈسٹرکٹ کا سنگِ بنیاد بھی رکھا گیا،
ماہِ جون 2021میں حکومت پنجاب نے تاریخ ساز بجٹ دیا اور 337سہولت بازاروں کے قیام سے عام آدمی کو مہنگائی کے دوران ریلیف بھی دیا گیا، اگست میں شاہکام فلائی اوور کا سنگِ بنیاد، کوہِ سلیمان میں سیاحتی منصوبے کا افتتاح ہوا جبکہ وزیرِ اعظم عمران خان نے سگیاں کے مقام پر دنیا کے سب سے بڑے میاواکی جنگل کا سنگِ بنیاد بھی رکھا،حسان خاور کا کہنا تھا کہ اسی سال پاکستان کی تاریخ کا مضبوط ترین لوکل گورنمنٹ سسٹم بھی منظور کیا گیا،انہوں نے مزید کہا کہ اس نئے سال میں ہم نے وزیرِ اعظم کے ویژن اور وزیرِ اعلی کے مشن کے تحت پنجاب کو بہتر سے بہترین بنانا ہے
