اسلام آباد (رپورٹنگ آن لائن)چیئرمین پی ٹی آئی بیرسٹر گوہر نے کہا ہے کہ تاریخ کے سیاہ اور دل دہلا دینے والی دہشت گردی میں سے ایک کی یاد میں سر جھکاتے ہیں۔
سانحہ اے پی ایس کی برسی پر اپنے پیغام میں بیرسٹر گوہر نے کہا کہ اس دن معصوم بچوں کو ہم سے چھین لیا گیا تھا، شہدا کے اہلخانہ نے جو درد اٹھایا وہ الفاظ سے باہر ہے۔ ہم غم، دکھ اور یکجہتی میں ان کے ساتھ کھڑے ہیں۔انہوں نے کہا کہ 16 دسمبر کو کبھی فراموش نہیں کیا جائے گا، اس سانحے نے ہمیں دہشت گردی کے خلاف غیرمتزلزل عزم میں ایک قوم کے طور پر متحد کیا۔چیئرمین پی ٹی آئی نے مزید کہا کہ ان معصوم جانوں اور ان لوگوں کو خراج تحسین پیش کرتے ہیں جو قربانی کے ساتھ ملک کی حفاظت جاری رکھے ہوئے ہیں۔
بیرسٹر گوہر نے یہ بھی کہا کہ دہشت گردی پر سیاسی اسکورنگ یا سیاسی اختلافات کی گنجائش نہیں ہے، ہم سب اپنے وطن کو بچانے کے لیے دہشت گردی کے خلاف متحد ہو کر لڑیں گے۔
