110سے زائد جانیں چلی جائیں تو بات بھی نہ کی جائے؟ منعم ظفر

کراچی(رپورٹنگ آن لائن) امیرِ جماعتِ اسلامی کراچی منعم ظفر نے کہاہے کہ اس وقت سب سے بڑے ڈمپر اور ہیوی ٹریفک سے ہونے والے حادثات ہیں۔

منعم ظفر نے کراچی میں پریس کانفرنس کرتے ہوئے کہا ہے کہ شہر میں ٹریفک کے مسائل ہیں، ٹریفک کی روانی بہتر کرنے کے لیے اقدامات کیے جائیں۔انہوں نے کہا کہ وزیرِ اعلی سندھ کہتے ہیں کہ یہ انتظامی معاملہ ہے، اس پر سیاست نہیں ہونی چاہیے، حالانکہ یہ انتظامی معاملہ نہیں۔امیرِ جماعتِ اسلامی کراچی نے کہا کہ یہ لوگوں کی جان کا مسئلہ ہے، اس مسئلے کو حل کیوں نہیں کرتے؟

منعم ظفر نے سوال کیا کہ ٹریفک حادثات میں 110 سے زائد جانیں چلی جائیں تو بات بھی نہ کی جائے؟۔انہوں نے کہاکہ میٹنگ پر میٹنگ ہو رہی ہیں، کوئی حل تو ہونا چاہیے، لوگوں کو ریلیف تو ملنا چاہیے۔امیرِ جماعتِ اسلامی کراچی نے کہا کہ جماعتِ اسلامی نے اپنی سفارشات پیش کی ہیں، ہم نے آئی جی سے ملاقات کی، وزیرِ ٹرانسپورٹ کے سامنے بھی سفارشات پیش کیں۔