کراچی (رپورٹنگ آن لائن)پاکستان پیپلز پارٹی کے چیئرمین بلاول بھٹو زرداری نے مقبوضہ جموں و کشمیر کے عوام کے ساتھ پاکستان کے غیر متزلزل اظہارِ یکجہتی کا اعادہ کرتے ہوئے کہا ہے کہ یومِ سیاہ اس دن کی یاد دلاتا ہے جب بھارتی افواج نے 1947 میں کشمیر غیر قانونی قبضہ کیا تھا۔
میڈیا سیل بلاول ہاس سے جاری کردہ پریس ریلیز کے مطابق، پی پی پی چیئرمین نے اپنے پیغام میں کہا کہ 27 اکتوبر صرف ایک تاریخ نہیں بلکہ کشمیری عوام کی دہائیوں پر محیط قربانیوں، جدوجہد اور جرات و حوصلے کی علامت ہے۔ انہوں نے کہا کہ گزشتہ سات دہائیوں سے زائد عرصے سے مقبوضہ کشمیر کے مرد، خواتین اور بچے ظلم، جبر اور ناانصافی کے بوجھ تلے پسے ہوئے ہیں، لیکن ان کا عزم، حوصلہ اور جدوجہد آج بھی ناقابلِ تسخیر ہیں۔ چیئرمین بلاول بھٹو زرداری نے کہا کہ 5 اگست 2019 کو بھارت کی جانب سے جموں و کشمیر کی خصوصی حیثیت کے یکطرفہ خاتمے کے بعد وادی پر نقل و حرکت، ابلاغ اور اجتماع پر سخت پابندیاں عائد ہیں، جبکہ جعلی انکاونٹرز ، زیرِ حراست تشدد، ماورائے عدالت قتل اور جبری گمشدگیوں میں مزید اضافہ ہوا ہے۔
انہوں نے عالمی برادری سے اپیل کی کہ وہ اپنے ضمیر کی آواز سنتے ہوئے کشمیری عوام کے حقِ خودارادیت کو یقینی بنائے جیسا کہ اقوامِ متحدہ کی قراردادوں میں تسلیم کیا گیا ہے۔ چیئرمین بلاول بھٹو زرداری نے اعادہ کیا کہ پاکستان پیپلز پارٹی، قائدِ عوام شہید ذوالفقار علی بھٹو اور شہید محترمہ بینظیر بھٹو کے وژن کے مطابق، کشمیری عوام کے ساتھ شانہ بشانہ کھڑی ہے اور اس دن تک ان کی حمایت جاری رکھے گی جب تک ان کا آزادی اور انصاف کا خواب شرمند تعبیر نہیں ہو جاتا۔
