اسلام آباد (رپورٹنگ آن لائن)چیئرمین سینیٹ سید یوسف رضا گیلانی نے کہا ہے کہ پاکستان میں سرمایہ کاری کے لئے ماحول سازگار ہے ، سرمایہ کاروں کو تحفظ فراہم کریں گے،پاکستان سویڈن کے ساتھ تعلقات کو قدر کی نگاہ سے دیکھتا ہے،کثیر الجہتی شعبوں میں تعاون عوامی روابط کو فروغ دینے میں مدد گار ثابت ہو گا۔
سینیٹ سیکرٹریٹ کی جانب سے جاری بیان کے مطابق ان خیالات کا اظہار چیئرمین سینیٹ نے سویڈن کی سفیر الیگزینڈرا کانیل برخ سے اسلام آباد میں ملاقات کے دوران گفتگوکرتے ہوئے کیا۔
چیئرمین سینیٹ نےکہا کہ پاکستان سویڈن کے ساتھ تعلقات کو قدر کی نگاہ سے دیکھتا ہے، سویڈن کے ساتھ سفارتی تعلقات 75سال پر محیط ، دن بدن مضبوط ہو رہے ہیں،بین الاقوامی فورمز پر تعاون مثبت ہے۔
یوسف رضا گیلانی نے کہا کہ سرمایہ کاری کے لئے ماحول سازگار ہے ، سرمایہ کاروں کو تحفظ فراہم کریں گے،زراعت ، تعلیم ، موسمیاتی تبدیلیوں سمیت مختلف شعبوں میں تعاون کے لئے وسیع گنجائش موجود ہے،پاکستان میں چمڑے کی مصنوعات کی تیاری کی مہارت موجود ہے۔
چیئرمین سینیٹ نے کہا کہ کثیر الجہتی شعبوں میں تعاون عوامی روابط کو فروغ دینے میں مدد گار ثابت ہو گا۔انہوں نے سفیر کو ایوان بالا کے کام کے طریقہ کار ، اہمیت ، آئینی کردار کے بارے میں بھی آگاہ کیا ۔
سید یوسف رضا گیلانی نے کہا کہ پارلیمانی سطح پر وفود کے تبادلوں میں تیزی لانا وقت کی اہم ضرورت ہے،پاکستان کی سینیٹ میں پاکستان سویڈن فرینڈشپ تشکیل دیا گیا ہے،پارلیمانی وفود کے تبادلوں سے عوام کو مزید قریب لانے میں مدد ملے گی۔ انہوں نے کہا کہ آئی پی یو اور دیگر سطح پر تعاون بہترین ہے،
چیئرمین سینیٹ نے طلبا کے لئے سکالرشپس بڑھانے کی بھی تجویز دی۔چیئرمین سینیٹ نے سویڈن کو نیٹو کا رکن بننے پر بھی مبارکباد دی ۔ انہوں نے کہا کہ اسلامو فوبیا کے بڑھتے ہوئے رجحان پر تشویش ہے،چیئرمین سینیٹ نے سویڈن کی سفیر کو ملتان کا دورہ کرنے کی دعوت دیتے ہوئے کہا کہ ملتان تاریخی شہر ہے ، مقامی صنعت اور تجارت کو فروغ دے سکتے ہیں۔ انہوں نے سفیر کےلئے نیک خواہشات کا اظہار کیا۔
