کراچی (رپورٹنگ آن لائن) قائد حزب اختلاف سندھ اسمبلی حلیم عادل شیخ نے کہا ہے کہ کوئی بھوکا نا سوئے یہ ہمارے وزیراعظم کی سوچ ہے،جو لوگ پہلے پلوں کے نیچے پڑے ہوتے تھے اب انہیں 3 وقت کا کھانا پینا دستیاب ہوتا ہے، صحت کارڈ پورے ملک میں دیا جارہا ہے ،کامیاب جوان پروگرام کے تحت لوگوں کو قرضے بھی دیے جارہے ہیں۔
تفصیلات کے مطابق کوئی بھوکا نا سوئے مہم کے تحت ایمپریس مارکیٹ پر احساس عالمگیر فوڈ پروگرام کا آغاز کیا گیا ۔ فوڈ پروگرام کے تحت ایمپریس مارکیٹ کے مرکزی گیٹ پر کوئی بھوکا نا سوئے کا ٹرک لگا دیا گیا، ٹرک لگنے کے بعد مستحق شہرہوں کی بڑی تعداد جمع ہوئی اور کھانا کھایا۔
اس موقع پر میڈیا سے گفتگو کرتے ہوئے قائد حزب اختلاف سندھ اسمبلی حلیم عادل شیخ نے کہا کہ کوئی بھوکا نا سوئے یہ ہمارے وزیراعظم کی سوچ ہے، اسی سوچ کے تحت 27 پناہ گاہیں اور گاڑیاں بنائی گئی ہیں۔ حلیم عادل شیخ نے کہا کہ جو لوگ پہلے پلوں کے نیچے پڑے ہوتے تھے اب انہیں 3 وقت کا کھانا پینا دستیاب ہوتا ہے، سندھ میں 7 پناہ گاہیں اور 7 گاڑیاں ہیں، 5 لاکھ لوگ اس سے استفادہ حاصل کرچکے ہیں۔
حلیم عادل شیخ کا کہنا تھا کہ صحت کارڈ پورے ملک میں دیا جارہا ہے جبکہ کامیاب جوان پروگرام کے تحت لوگوں کو قرضے بھی دیے جارہے ہیں، ایس ایم ایز کے تحت لوگوں کو چھوٹے قرضے فراہم کئے جارہے ہیں۔ قائد حزب اختلاف نے کہا کہ ہمارے وزیراعظم کا مشن مدینے کے رہاست کا تھا مستحق لوگوں کو معیاری کھانا فراہم کیا جارہا ہے جبکہ 10 لاکھ روپے کی نفت طبی سہولیات فراہم کررہے ہیں۔ انہوں نے مزید کہا کہ آج تک پہلے کبھی کسی نے ایسا نہیں سوچا۔
