لاہور (رپورٹنگ آن لائن ) امیر جماعت اسلامی پنجاب وسطی محمد جاوید قصوری نے کہا ہے کہ گرانفروشوں نے رمضان کے تقدس کو پامال کرکے رکھ دیا ہے ،پھلوں سبزیوں سمیت ہر چیز کی قیمت دوگنی ہو چکی ہے، حکمران رمضان میں مہنگائی کو قابو میں رکھنے کے وعدے تو کرتے ہیں مگر حقیقت میں حالات جوں کے توں ہی ہیں.
لوٹ مار کرنے والوں کو کسی کا کوئی خوف نہیں،مارکیٹ کمیٹیاں اور صارفین کے تحفظ کے ادارے غیر موثر ہیں، ناجائز منافع خور آزادانہ طور پر منافع خوری کرتے ہیں، ذخیرہ اندوزوں اور ناجائز منافع خوروں کے خلاف فوری کارروائی کرتے ہوئے عام آدمی کو ریلیف فراہم کیا جائے۔انہوں نے ان خیالات کا اظہار مختلف تقریبات سے خطاب کرتے ہوئے کیا ۔
ان کا کہنا تھا کہ قوم کا موجودہ حکمرانوں پرسے اعتماد اٹھ چکا ہے ۔اس کو بحال کرنے کے لئے فرسودہ نظام اور فارم 47کے حکمرانوں سے نجات حاصل کرنی ہو گی۔ ملک کے حالات دن بدن ابتر ہوتے چلے جا رہے ہیں ۔25کروڑ عوام کو کوئی پرسان حال نہیں ہے ۔ بد قسمتی سے آج ہمارے ملک کا نظام جن لوگوں کے ہاتھوں میں ہے وہ اللہ کے باغی بندے ہیں ۔
ہمیں یہ اقتدار اور اختیار ان سے حاصل کرکے اللہ کے نیک بندوں کو دینا ہے ۔ پاکستان کو اغیار کی غلامی میں دینے والے حکمران خود کو قوم کے سامنے جوابدہ نہیں سمجھتے۔ ان کی وجہ سے آج پاکستان کی معیشت برباد ہو چکی ہے۔ انہوں نے کہا کہ حکمرانوں کی عیاشیاں ختم ہونے کا نام نہیں لے رہی ۔ جماعت اسلامی دین حق کے غلبے کے لئے جدوجہد کر رہی ہے ۔
اسلام کے نام پر وجود میں آنے والے ملک کے اندر صرف اور صرف اللہ کا دین ہی کامیاب ہو سکتا ہے ۔ محمد جاوید قصوری نے اس حوالے سے مزید کہا کہ ملک غربت اور جہالت میں ڈوبا ہوا ہے لیکن ہماری سول اور غیر سول افسرشاہی اپنے ٹھاٹھ باٹھ چھوڑنے تیار نہیں ہے ۔ملٹی نیشنل کمپنیاںخون نچوڑ رہی ہیں۔
جو حکومت آتی ہے وہ پروٹوکول اور اپنی مراعات کے حصول میں کمی تو کرتی نہیں بلکہ الٹا ملک کو مزید قرضوں کے بوجھ تلے دبا دیتی ہے۔ معیشت زبوں حالی کا شکار اور عوام کی مشکلات میں دن بدن اضافہ ہوتا چلا جا رہا ہے ۔ پی ڈی ایم ٹو کی حکومت اندازوں سے بھی زیادہ خراب کارکردگی کا مظاہرہ کر رہی ہے ۔
