لاہور(رپورٹنگ آن لائن) قومی ٹیم کے سابق فاسٹ بالر محمد عامر نے پاک سری لنکا میچ میں حسین طلعت کی کارکردگی کو سراہتے ہوئے ایکس کے ذریعے اپنے سابق بیان پر مہر تصدیق ثبت کردی۔
تفصیلات کے مطابق ایشیا کپ 2025 سپر فور مرحلے میں پاکستان اور سری لنکا کی ٹیمیں مدمقابل تھیں جس میں شاہینوں نے اپنی بہترین کارکردگی کا مظاہرہ کیا۔ایشیا کپ ٹی20 ٹورنامنٹ کے سپر فور مرحلے میں پاکستان نے سری لنکا کو 5 وکٹوں سے شکست دیکر 2 اہم پوائنٹس حاصل کرلیے جس کے بعد اس کے فائنل میں پہنچنے کے امکانات کافی حد تک روشن ہوگئے ۔
میچ کے دوران محمد نواز اور حسین طلعت نے اپنی ذمہ درانہ بیٹنگ کا مظاہرہ کیا جس کی بدولت قومی ٹیم کے حصے میں کامیابی آئی۔اس حوالے سے قومی ٹیم کے سابق فاسٹ بالر محمد عامر نے سماجی رابطے کی ویب سائٹ ایکس (سابقہ ٹوئٹر) پر اپنے ایک پیغام میں کہا کہ ہاں جی! حسین طلعت کا انتخاب ٹھیک تھا نا؟’محمد عامر نے کہاکہ یہ صرف ان لوگوں سے پوچھنا ہے جو کہہ رہے تھے کہ اسے (حسین طلعت) قومی ٹیم میں نہیں ہونا چاہیے۔
