ہال آف فیم نہیں بھی دیتے تو کیا فرق پڑتا؟،جاوید میانداد کا کراچی ٹیسٹ میں دعوت نامہ نہ ملنے پر شکوہ

کراچی (ر پورٹنگ آن لائن)لیجنڈری کرکٹر اور سابق کپتان قومی کرکٹ ٹیم جاوید میانداد نے کراچی ٹیسٹ میں دعوت نامہ نہ ملنے پر شکوہ کرتے ہوئے کہاہے کہ ہال آف فیم نہیں بھی دیتے تو کیا فرق پڑتا؟۔میڈیا سے گفتگو کرتے ہوئے جاوید میانداد نے کہا کہ کراچی ٹیسٹ میں پاکستان کرکٹ بورڈ (پی سی بی) نے مجھے بلایا نہیں تو دیکھنے کیسے آتا؟۔انہوں نے کہا کہ ہال آف فیم نہیں بھی دیتے تو کیا فرق پڑتا؟ میرا سب سے بڑا اعزاز پاکستان ہے۔ٹیسٹ میچز کی پچ پر تبصرہ کرتے ہوئے جاوید میانداد نے کہا کہ ہمارے دور میں بھی پچز بنتی تھیں تاہم تیسرے روز ہی نتیجہ آجاتا تھا۔

جاوید میانداد نے کہا کہ پچ بنانے کے لیے کوالیفائیڈ کیوریٹرز ہونا چاہئیں، پاکستان کو تیسرا ٹیسٹ جیت کر سیریز اپنے نام کرنی چاہیے۔لیجنڈری کرکٹر نے کہا کہ کوئی 200 رن بنالے تو پی سی بی اسے کپتان بنا دیتا ہے، کپتانی کے لیے پہلے کھلاڑی کو بچپن سے گروم کیا جاتا ہے۔انہوںنے کہاکہ کپتان بنانے سے پہلے کھلاڑی کو جانچنا ضروری ہے، دیگر ساتھیوں کے ساتھ کپتان کا رویہ اہمیت رکھتا ہے، کپتان کا کرکٹنگ برین کیسا ہے یہ دیکھنا ضروری ہوتا ہے۔