اسلام آباد (رپورٹنگ آن لائن)اسلام آباد ہائی کورٹ نے فواد چوہدری کے ناقابلِ ضمانت وارنٹ گرفتاری معطل کرتے ہوئے فواد چوہدری کو الیکشن کمیشن میں پیش ہونے کا حکم دیدیا۔
الیکشن کمیشن کی جانب سے ناقابلِ ضمانت وارنٹ گرفتاری جاری کیے جانے کے خلاف فواد چوہدری کی درخواست پر سماعت جسٹس طارق محمود جہانگیری نے کی۔عدالت میں دلائل د یتے ہوئے فواد چوہدری کے وکیل ایڈووکیٹ فیصل چوہدری نے کہا کہ الیکشن کمیشن میں فواد چوہدری کے خلاف توہینِ کمیشن کی کارروائی جاری ہے ، جس پر عدالت نے ریمارکس دیے کہ چیف جسٹس نے فیصلہ دیا کہ توہینِ کمیشن کی کارروائی جاری رہے گی۔
اسلام آباد ہائی کورٹ نے فواد چوہدری کے ناقابلِ ضمانت وارنٹ گرفتاری معطل کر دئیے اور فواد چوہدری کو 20 جولائی کو الیکشن کمیشن کے سامنے پیش ہونے کا حکم دے دیا۔ جسٹس طارق جہانگیری نے ریمارکس دیے کہ آپ کے وارنٹ گرفتاری معطل کر رہے ہیں، کمیشن کے سامنے پیش ہوں۔ کمیشن کے سامنے پیش نہ ہوئے تو توہینِ عدالت کی کارروائی شروع کریں گے۔