کراچی(رپورٹنگ آن لائن)ترجمان سندھ حکومت مرتضی وہاب نے کہا ہے کہ گزشتہ 35 روز کے دوران ملک میں مہنگائی کا ایک نیا طوفان آیا۔عام آدمی سمجھ چکا عمران خان ان کی بات نہیں کررہے، موجودہ حکومت عوام کی نگاہ میں بری طرح فیل ہوچکی ہے، وزیراعظم اور وفاقی وزرا گلگت بلتستان اتر چکے ہیں، مہنگائی کے پیچھے پی ڈی ایم یا اپوزیشن نہیں،حکومتی نااہلی ہے، وفاقی حکومت عوام دشمن پالیسیاں بنا رہی ہے، جمعرات کوپریس کانفرنس کے دوران انہوں نے کہ حکومت صرف باتوں کی حد تک موجود ہے، عملی طور پر ناکام ہو چکی ہے۔
35روز میں مرغی کی قیمتوں میں 29 فیصد اضافہ ہوا، 163 روپے میں ملنے والی مرغی کی قیمت 211روپے فی کلو تک آگئی جب کہ 142روپے فی درجن انڈے 168روپے کے ہوگئے۔ترجمان سندھ حکومت کا کہنا تھا کہ آلو 68روپے سے 74روپے فی کلو ہوگئے، پیاز 67سے 78روپے فی کلو ہو چکا ہے۔ ٹماٹر 110روپے سے بڑھ کر 147روپے فی کلو ہو چکا ہے۔مرتضی وہاب نے کہا کہ چینی 96روپے سے 101روپے فی کلو ہوگئی ہے، لہسن 229روپے سے 237روپے فی کلو ہوچکا ہے اور 35روز میں ماچس کی قیمت میں 5 فیصد اضافہ ہوا ہے۔
ان کا کہنا تھا کہ 35روز میں ایل پی جی سلنڈر کی قیمت میں 12فیصد اضافہ ہوا ہے۔ مرتضی وہاب نے کہا کہ پیپلز پارٹی نے مہنگائی کے مسئلے کو اجاگر کیا، بلاول بھٹو نے جگہ جگہ عوامی مسائل کی بات کی،عام آدمی بلاول بھٹو کی بات سمجھ رہا ہے، عام آدمی سمجھ چکا عمران خان ان کی بات نہیں کررہے۔مرتضی وہاب نے کہا کہ موجودہ حکومت عوام کی نگاہ میں بری طرح فیل ہوچکی ہے، وزیراعظم اور وفاقی وزرا گلگت بلتستان اتر چکے ہیں، مہنگائی کے پیچھے پی ڈی ایم یا اپوزیشن نہیں،حکومتی نااہلی ہے۔انہوں نے کہا کہ پیپلزپارٹی ہمیشہ کہتی ہے ہم وفاق کی جماعت ہیں، ذوالفقار بھٹو اور بینظیر بھٹو کی خدمات عوام کے دلوں میں زندہ ہیں، عوام کی خدمت پیپلزپارٹی کا فخر ہیں۔
پیپلز پارٹی کے رہنما نے کہا کہ اوگرا میں 19نمائندوں میں 2کا تعلق سندھ سے ہے جب کہ بلوچستان کا کوئی نمائندہ موجود ہی نہیں ہے۔ حکومت من پسند افرادکو فیور دینے کیلئے عوام کا استحصال کررہی ہے۔ترجمان سندھ حکومت کا کہنا تھا کہ وفاقی حکومت عوام دشمن پالیسیاں بنا رہی ہے، جزائر کے معاملے کا سی سی آئی سے کوئی تعلق نہیں، جزائر سندھ کے عوام کی ملکیت ہیں۔
