ولنگٹن (رپورٹنگ آن لائن) نیوزی لینڈ کرکٹ ٹیم کے کپتان کین ولیمسن کی پاکستان کے خلاف سیریز کے دوسرے ٹیسٹ میں ٹیم میں واپسی کا امکان ہے ، تجربہ کار آل راؤنڈر کولن ڈی گرام ٹیسٹ سیریز سے باہر ہوگئے ہیں۔میڈیا رپورٹ کے مطابق نیوزی لینڈ کے ہیڈ کوچ گیری اسٹیڈ نے بتایا کہ تینوں طرز کے کپتان کین ولیمسن اپنے پہلے بچے کی پیدائش کے سلسلے میں چھٹیوں پر تھے، تاہم پاکستان کے خلاف دوسرے ٹی ٹوئنٹی سے پہلے ان کی واپسی متوقع ہے۔
انہوںنے کہاکہ کین ولیمسن کے بچے کی پیدائش کے حوالے سے تاحال کوئی خبر نہیں ہے لیکن ہم انہیں اجازت دیں گے لیکن واپسی کا انتظار ہے۔انہوں نے کہا کہ اس وقت ہمارا منصوبہ یہی ہے کہ وہ دوسرے اور تیسرے ٹی ٹوئنٹی میں شرکت کریں گے۔خیال رہے کہ پاکستان اور نیوزی لینڈ کے درمیان تین میچوں کی ٹی ٹوئنٹی سیریز کا آغاز آکلینڈ میں 18 دسمبر کو ہوگا، دوسرا ٹی ٹوئنٹی 20 اور آخری ٹی ٹوئنٹی 22 دسمبر کو نیپئر میں کھیلا جائے گا۔ٹی ٹوئنٹی سیریز کے فوری بعد 26 دسمبر کو دو میچوں کی ٹیسٹ سیریز شروع ہوگی، جس کے لیے کولن ڈی گرام دستیاب نہیں ہوں گے۔نیوزی لینڈ کے ہیڈ کوچ کے مطابق کولن ڈی گرام ٹخنے کی انجری سے مکمل طور پر صحت یاب نہیں ہوئے ہیں اور ممکنہ طور پر جنوری میں ڈومیسٹک کرکٹ میں واپسی کریں گے۔انہوں نے کہا کہ ان کے دائیں پاؤں پر زیادہ دباؤ ہے اور وہ اس وقت رننگ کے قابل نہیں ہیں اور باؤلنگ بھی نہیں کر پائیں گے۔سیریز میں نیوزی لینڈ کو دیگر کھلاڑیوں لوکی فرگوسن اور اجاز پٹیل کی انجریز کا بھی سامنا ہے اور ٹیم انتظامیہ کو ان کی حتمی رپورٹ کا انتظار ہے۔
