اسلام آباد (رپورٹنگ آن لائن) ڈپٹی اسپیکر قومی اسمبلی قاسم خان سوری نے کہا ہے کہ جس طرح کیمونسٹ پارٹی نے 70 سالہ اقتدار میں اپنے ملک کو غربت کی لکیر سے نکالا وہ دنیا کی تاریخ میں ایک مثال ہے اور کیمونسٹ پارٹی دنیا کی تاریخی جماعت ہے کہ جو اتنا بڑا انقلاب لے کر آئی۔
چینی کیمونسٹ پارٹی کی صد سالہ تقریبات کے حوالے سے جاری اپنے ایک ویڈیو پیغام میں انہوں نے کہا کہ چینی کیمونسٹ پارٹی کی صد سالویں سالگرہ پر مبارکباد پیش کرتا ہوں، جس طرح کیمونسٹ پارٹی نے 70 سالہ اقتدار میں اپنے ملک کو غربت کی لکیر سے نکالا وہ دنیا کی تاریخ میں ایک مثال ہے اور کیمونسٹ پارٹی دنیا کی تاریخی جماعت ہے کہ جو اتنا بڑا انقلاب لے کر آئی۔
چینی کیمونسٹ پارٹی نے تقریباً 80 کروڑ لوگوں کو غربت کی لکیر سے نکالا۔ قاسم خان سوری نے کہا کہ چین نے جس تیزی سے ترقی کی ہے اور دنیا میں ایک بڑی اقتصادی قوت بنا ہے وہ ایک مثال ہے۔ 2018 سے پاکستان میں برسر اقتدار پاکستان تحریکِ انصاف چینی کیمونسٹ پارٹی کو اس بے مثال کامیابی پر مبارکباد پیش کرتی ہے۔ڈپٹی اسپیکر قومی اسمبلی نے کہا کہ چین پوری دنیا اور خاص کر ہمارے ایشیا میں ایک مثال ہے جس طرح چین نے ترقی کی اپنی پوری قوم میں ڈسپلن لے کر آئے اپنی ترقی سے پوری دنیا کو حیران کر دیا۔
ایک ارب چالیس کروڑ آبادی والے ملک نے اپنے لوگوں کو سہولیات دیں اپنی جی ڈی پی بڑھائی وہ قابل تقلید ہے۔ انہوں نے کہا کہ ہم چین کے ساتھ مل کر اپنے ملک میں ترقی لا سکتے ہیں، چین کے ساتھ سی پیک کا منصوبہ ایک عظیم منصوبہ ہے اس سے پاکستان اور اس خطے میں ترقی آئے گی۔ انہوں نے کہا چین پاکستان کا ایک پرانا اور آزمودہ دوست ہے اور مشکل کی ہر گھڑی میں پاکستان کے ساتھ کھڑا رہا ہے، جس طرح چین نے کورونا کے دوران بھی پاکستان کا ساتھ دیا اس پر ان کا شکر گزار ہوں
۔ قاسم خان سوری نے امید ظاہر کی کہ جس طرح چینی کیمونسٹ پارٹی کے 70 سالہ دورِ اقتدار میں چین کی عوام خوش ہے بلکل اسی طرح آنے والے وقتوں میں بھی خوش رہے گی
