کراچی (رپورٹنگ آن لائن) ایڈمنسٹریٹر کراچی، مشیر قانون اور ترجمان حکومت سندھ بیرسٹر مرتضی وہاب نے کہا ہے کہ کھیلوں کے میدان آباد ہوں گے تو مثبت سرگرمیوں کو فروغ ملے گا۔
تفصیلات کے مطابق مرتضی وہاب کی ویمن اسپورٹس کمپلیکس گلشن اقبال آمد ہوئی، جہاں انہوں نے بیڈمنٹن کورٹ کا افتتاح کیا، اس موقع پر ان کا کہنا تھا کہ کھیلوں کی سہولتیں فراہم کرنا ہماری ترجیحات میں شامل ہیں۔ انہوں نے کہا کہ خواتین کھیلوں میں پاکستان کا نام روشن کر رہی ہیں، کھیلوں کی سہولتوں سے نوجوان صحت مند سرگرمیوں کی جانب راغب ہوتے ہیں۔
ان کا کہنا تھا کہ کے ایم سی ویمن اسپورٹس کمپلیکس گلشن اقبال کو خواتین کے لیے کھیلوں کا مرکز بنائیں گے، کھیلوں کے میدان آباد ہوں گے تو مثبت سرگرمیوں کو فروغ ملے گا۔ ایڈمنسٹریٹر کراچی، مشیر قانون اور ترجمان حکومت سندھ بیرسٹر مرتضی وہاب نے نئے بیڈمنٹن کورٹ میں نمائشی میچ بھی دیکھا۔
