اسلام آباد (رپورٹنگ آن لائن) تعلیمی اداروں میں عالمی وبا کورونا وائرس کے بڑھتے کیسز سے متعلق صوبائی وزرائے تعلیم کا اجلاس جمعرات5 نومبر کو طلب کر لیا گیا ہے۔ذرائع کے مطابق کورونا وائرس کیسز میں اضافے کے بعد وفاقی وزیر برائے تعلیم شفقت محمود کی زیر صدارت صوبائی وزرائے تعلیم کا اجلاس 5 نومبر کو طلب کیا گیا ۔اجلاس میں چاروں صوبوں کے وزرا سمیت آزادکشمیر، گلگت بلتستان کے وزرائے تعلیم بھی وڈیولنک سے اجلاس میں شریک ہوں گے۔وفاقی و صوبائی وزرا کی جانب سے اجلاس میں تعلیمی اداروں میں کورونا وائرس کیسز سے متعلق جائزہ لیا جائیگا۔ذرائع کے مطابق اجلاس میں تعلیمی اداروں میں سردیوں کی چھٹیوں سے متعلق فیصلہ متوقع ہے ، اجلاس میں اپریل سے اگست تک کے تعلیمی سال پر گفتگو کی جائے گی۔ذرائع کے مطابق اجلاس میں آٹھویں کلاس کے بورڈ امتحانات سے متعلق فیصلہ ہوگا۔
