اسلام آباد (رپورٹنگ آن لائن)وزیر اعظم کے مشیر برائے سیاسی امور سینیٹر رانا ثناء اللہ نے کہا ہے کہ 27 اکتوبر ہمیں بھارتی غیر قانونی زیر تسلط جموں و کشمیر کے عوام پر ڈھائے جانے والے مظالم کی یاد دلاتا ہے،کشمیری عوام کی منصفانہ جدوجہد کی اخلاقی، سیاسی اور سفارتی حمایت جاری رکھیں گے۔
اپنے بیان میں انہوں نے کہا کہ 27 اکتوبر 1947 کو بھارت نے جموں و کشمیر پر غیر قانونی قبضہ کیا ،بھارت کا یہ غاصبانہ عمل کشمیری عوام کے حق خود ارادیت پر ایک براہ راست حملہ تھا۔ رانا ثناء اللہ نے کہا کہ اس المناک دن پر، میں اپنے کشمیری بھائیوں اور بہنوں کے ساتھ مکمل یکجہتی کا اظہار کرتا ہوں،ہم کشمیریوں کی لازوال قربانیوں اور دہائیوں سے جاری ان کی جدوجہد آزادی کو سلام پیش کرتے ہیں۔
انہوں نے کہا کہ کشمیری عوام نے ثابت کیا کہ وہ بھارتی جبر کو قبول نہیں کریں گے،کشمیری عوام کی ثابت قدمی اور انصاف کے لیے غیر متزلزل عزم ہمارے لیے مشعل راہ ہے،ہم کشمیری عوام کی منصفانہ جدوجہد کی اخلاقی، سیاسی اور سفارتی حمایت جاری رکھیں گے،اقوام متحدہ کو غیر قانونی زیر تسلط جموں و کشمیر میں جاری انسانی حقوق کی خلاف ورزیوں کا نوٹس لینا چاہئے۔
رانا ثناء اللہ نے کہا کہ عالمی برادری اس دیرینہ تنازعہ کو اقوام متحدہ کی سلامتی کونسل کی قراردادوں کے مطابق حل کروائے۔ انہوں نے کہا کہ کشمیر کا مسئلہ صرف کشمیریوں کا نہیں، بلکہ انسانیت اور عالمی انصاف کا مسئلہ ہے،اللہ تعالیٰ کشمیری عوام کو جلد آزادی کی نعمت سے سرفراز فرمائے۔
