اسلام آ باد (رپورٹنگ آن لائن) وفاقی وزیر اطلاعات چوہدری فواد حسین نے کہا ہے کہ اقوام متحدہ کی سلامتی کونسل نے 5 جنوری 1949 کو قرارداد کے ذریعے کشمیری عوام کو یہ حق دیا تھا کہ وہ اپنی مرضی کے مطابق اپنے مستقبل کا فیصلہ کرسکتے ہیں،آج کشمیری عوام کے ساتھ کئے گئے اس وعدے کو 73 برس گذر گئے لیکن افسوس کہ یہ وعدہ آج تک پورا نہیں ہو سکا، کنٹرول لائن کے دونوں جانب اور دنیا بھر میں کشمیری عوام یوم حق خود ارادیت منا رہے ہیں ۔
5 جنوری یوم حق خودارادیت کشمیر کے موقع پر اپنے پیغام میں چوہدری فواد حسین نے کہا جموں و کشمیر کے لوگ اقوام متحدہ کی سلامتی کونسل کی قراردادوں کے مطابق تنازعہ کشمیر کے پرامن حل کے منتظر ہیں،اقوام متحدہ کی قرارداد کے 73 سال پورے ہونے پر بھارت نے کٹھ پتلی حد بندی کمیشن کے خلاف احتجاج روکنے کے لئے کشمیری قیادت کی گرفتاریوں کا سلسلہ شروع کر رکھا ہے، بھارت نے کشمیر کو ایک بڑی جیل میں تبدیل کردیا ہے، جہاں لوگوں کو گرفتار کرنا، حریت رہنماں کو نظربند کرنا اور کرفیو اور پابندیاں لگانا روز کا معمول بن گیا ہے،
چوہدری فواد حسین نے کہا بھارت مقبوضہ جموں و کشمیر کی حد بندی مذہب کی بنیاد پر تبدیل کرنے میں کوئی کسر نہیں چھوڑ رہا،مقبوضہ کشمیر میں کشمیری عوام پر بدترین مصائب اور ظلم ڈھائے جا رہے ہیں، اقوام متحدہ کی سلامتی کونسل اپنے وعدے پورے کرے،آج کے دن ہم اس عزم کا اعادہ کرتے ہیں کہ پاکستان کشمیریوں کو جائز حق ملنے اور جدوجہد آزادی کی کامیابی تک ان کی سیاسی، سفارتی اور اخلاقی حمایت جاری رکھے گا۔
