اسلام آباد (رپورٹنگ آن لائن)وزیر داخلہ اعجاز احمد شاہ نے کہا ہے کہ کشمیریوں پر ڈھائے جانے والے مظالم کو عالمی سطح پر حصول انصاف تک اجاگر کرتے رہیں گے،ہر پاکستانی کشمیریوں کے شانہ بشانہ کھڑا ہے ہمیں آپ کی تکالیف کا احساس ہے،ہم آخری دم تک اپنے کشمیری بھائیوں کی آواز بنیں گے۔
کشمیر کے یوم سیاہ کے موقع پر اپنے بیان میں انہوںنے کہاکہ آج کے دن کشمیری بھائیوں پر قابض ہو کر بھارت نے ظلم کی داستان کا آغاز کیا اور وہ 73 سال سے اپنے حق کی جنگ لڑ رہے ہیںـ اعجاز احمد شاہ نے کہاکہ بھارت کشمیریوں کو ان ہی کے علاقے میں اقلیت بنانا چاہتا ہے۔ وزیر داخلہ نے کہاکہ لاکھوں کشمیریوں کو اپنے ہی گھروں میں قیدی بنا دیا گیا ہے، آج میں ایک دفعہ پھر آزاد کشمیر اور مقبوضہ کشمیر سے تعلق رکھنے والے تمام کشمیریوں کو، باور کروانا چاہتا ہوں کہ آپ تنہا نہیں ہیں۔
انہوںنے کہاکہ میں سلام پیش کرتا ہوں تمام کشمیریوں کو کہ انہوں نے مظالم کے سامنے گھٹنے نہیں ٹیکے اور آج 73 سال گزرنے کے بعد بھی اپنے حق کے لیے آواز اٹھا رہے ہیں۔ انہوںنے کہاکہ ہر پاکستانی آپ کے شانہ بشانہ کھڑا ہے ہمیں آپ کی تکالیف کا احساس ہےـ وزیر داخلہ اعجاز احمد شاہ نے کہاکہ مقبوضہ کشمیر میں جاری انسانی حقوق کی خلاف ورزیوں اور نہتے کشمیریوں پر ڈھائے جانے والے مظالم کو عالمی سطح پر حصول انصاف تک اجاگر کرتے رہیں گےـ
اعجاز احمد شاہ نے کہاکہ آج دنیا کے سامنے ہندوستان کا اصلی چہرہ ہے نقاب ہو چکا ہےـ انہوںنے کہاکہ 5 اگست 2019 اور اس کے بعد ہونے والے اقدامات بھارت کی آر ایس ایس اور فاشسٹ ایجنڈے کی عکاسی کرتے ہیںـ انہوںنے کہاکہ تاریخ گواہ ہے کہ آر ایس ایس سے لے کر واجپائی اور پھر گجرات مظالم سے مودی کے تمام اقدامات ایک مہم کے تحت کئے گئے اور بھارت کا سیکیولر ڈرامہ بھی بے نقاب پو چکا ہےـ انہوںنے کہاکہ وزیر اعظم عمران خان بطور سفیر کشمیریوں کا مقدمہ لڑ رہے ہیں،انہوں نے اقوام متحدہ میں جس طرح کشمیریوں کے لئے آواز اٹھائی اس کی مثال نہیں ملتیـ انہوںنے کہاکہ ہم آخری دم تک اپنے کشمیری بھائیوں کی آواز بنیں گےـ
انہوںنے کہاکہ پوری پاکستانی قوم اپنے کشمیری بھائیوں کے ساتھ کھڑی ہے ،انشاء اللہ ہم کامیابی سے ہمکنار ہوں گے اور کشمیری آزادی کی فضا میں سانس لے سکیں گےـ انہوںنے کہاکہ مودی کو آج پیغام دینا چاہتا ہوں کہ اگر آپ کے جبر و ظلم سے کشمیریوں کے حوصلے پست ہو گئے ہوتے تو آج بھارت کو کرفیو کا سہارا نہ لینا پڑتا اور یہ کہ وہ اپنے ناپاک عزائم میں ہرگز کامیاب نہیں ہوں گے ـ
