لاہور (رپورٹنگ آن لائن )احتساب عدالت لاہور نے گجرات ترقیاتی منصوبوں میں کرپشن اور کک بیکس ریفرنس میں سابق وزیر اعلیٰ پنجاب چودھری پرویز الٰہی کو اگلی سماعت پر حاضری کے لئے طلب کر لیا۔
احتساب عدالت لاہور میںڈیوٹی جج قیصر نظیر بٹ نے گجرات ترقیاتی منصوبوں میں کرپشن اور کک بیکس سے متعلق کیس کی سماعت کی۔ سابق پرنسپل سیکرٹری محمد خان بھٹی سمیت دیگر ملزمان عدالت میں پیش ہوئے۔ اس موقع پر پرویز الٰہی کی جانب سے پلیڈر کی تبدیلی کی درخواست بھی دائر کی گئی، جس میں انہوں نے مختار احمد رانجھا کو اپنے نئے پلیڈر کے طور پر مقرر کرنے کی درخواست کی۔
پرویز الٰہی کے وکیل ایڈووکیٹ جاوید ارشد نے عدالت کو آگاہ کیا کہ سابق پلیڈر انوار حسین اب اسسٹنٹ ایڈووکیٹ جنرل تعینات ہو چکے ہیں جبکہ چوہدری نواز بھی اسسٹنٹ ایڈووکیٹ جنرل بن چکے ہیں۔عدالت نے سابق وزیراعلی پنجاب پرویز الٰہی کو حاضری سے استثنیٰ دینے کے معاملے پر ناراضگی کا اظہار کیا اور سوال کیا کہ کیا وکیل چاہتے ہیں کہ حاضری سے استثنیٰ ختم کر دیا جائے؟ ۔
پرویز الٰہی کا پلیڈر کی تبدیلی کے لئے پیش ہونا لازمی ہے۔عدالت نے چودھری پرویز الٰہی کو اگلی سماعت پر عدالت میں پیش ہونے کے لیے طلب کر لیا۔ بعد ازاں کیس کی مزید کارروائی 14اپریل تک ملتوی کردی گئی۔
