لاہور(رپورٹنگ آن لائن) پاکستان علما کونسل کے مرکزی چیئرمین حافظ محمد طاہر محمود اشرفی نے کہا ہے کہ کرونا کی وبا کی چوتھی لہر کی وجہ سے مریضوں میں مسلسل اضافہ ہو رہا ہے ، لہذا عید الاضحی کے موقع پر احتیاطی تدابیر پر مکمل عمل کریں ۔
عید کے موقع پر کوشش کریں کہ شاپنگ مالز ، عوامی مقامات پر ماسک پہن کر جائیں اور مساجد میں وضو گھر سے کر کے اور اپنی جائے نماز ساتھ لے کرجائیں، مساجد انتظامیہ کی طرف سے دی گئی ہدایات پر مکمل عمل کریں ، علما و مشائخ، خطبا ، نماز عید کے خطبات میں عوام الناس سے احتیاطی تدابیر پر عمل کرنے کی اپیل کے ساتھ صفائی کا خیال رکھنے اور عید کی خوشیوں میں مستحقین ، فقرا ، غربا اور مساکین کو شامل کرنے کا بھی درس دیں ۔
لاہور متحدہ علما بورڈ کے دفتر میں پاکستان علما کونسل کے مرکزی چیئرمین حافظ محمد طاہر محمود اشرفی ، مولانا عبد الوہاب روپڑی ، مولانا محمد خان لغاری ، مولانا اسد اللہ فاروق ، مولانا محمد علی نقشبندی ، مولانا محمد رفیق جامی ، علامہ سید ضیا اللہ شاہ بخاری ، علامہ زبیر عابد ، علامہ محمد حسین اکبر ، علامہ طاہر الحسن ، مولانا محمد اسلم صدیقی ، مولانا عبد القیوم فاروقی ، قاری عبد الحکیم اطہر ، مولانا قاسم قاسمی نے پریس کانفرنس سے خطاب کرتے ہوئے کہا کہ کرونا ایک وبا ہے ، جس سے حفاظت دعا اور احتیاطی تدابیر اور ویکسین سے ہی ممکن ہے لہذا عید الاضحی کے دوران شاپنگ مالز ، عوامی مقامات اور عید کے اجتماعات میں احتیاطی تدابیر پر مکمل عمل کرنے کی کوشش کی جائے ۔ رہنمائوں نے اپیل کی ہے کہ قربانی سنت ابراہیمی ہے جس کو ادا کرنے والوں پر لازم ہے کہ وہ احتیاطی تدابیر اور صفائی کا بھی خیال کریں ۔
صفائی نصف ایمان ہے اور کرونا کی وبا کے پھیلنے کا ایک ذریعہ عدم صفائی ہے لہذا عوام الناس عید الاضحی کے ایام میں صفائی کے حوالے سے خصوصی احتیاط کریں ۔ رہنمائوں نے کہا کہ عید کے موقع پر مستحقین ، فقرا ، مساکین اور غربا کو بھی عید کی خوشیوں میں شریک کریں۔ رہنمائوں نے کہا کہ شاپنگ مالز عوامی مقامات اور عید کے اجتماعات میں آنے والے ماسک کا استعمال کریں۔
عید گاہ میں آنے والے گھر سے وضو کر کے آئیں ، جائے نماز ساتھ لائیں اور مساجد انتظامیہ کی طرف سے کیے گئے انتظامات میں تعاون کریں ، مساجد انتظامیہ کی طرف سے جو احتیاطی تدابیر اختیار کی گئی ان پر عمل کیا جائے۔ رہنمائوں نے علما ، خطبا ، آئمہ سے اپیل کی ہے کہ وہ عید کے موقع پر امت مسلمہ کی وحدت و اتحاد ، مظلوم فلسطینیوں ، کشمیریوں اور مظلوم انسانیت کیلئے اور کرونا کی وبا سے نجات کیلئے خصوصی دعائوں کا اہتمام کریں اور عوام الناس سے احتیاطی تدابیر پر عمل کی اپیل کریں۔ رہنمائوں نے حج کے بہترین انتظامات پر سعودی عرب کی حکومت کا شکریہ ادا کیا اور خراج تحسین پیش کیا اور کہا کہ ان شا اللہ آئندہ سال حج اور عمرہ ماضی کی طرح ہو گا۔
ایک سوال کے جواب میں حافظ محمد طاہر محمود اشرفی نے کہا کہ عید کے موقع پر ہم افغانستان کے تمام گروپوں سے امن مصالحت اور مذاکرات کی اپیل کرتے ہیں۔ پاکستان الزام تراشی پر یقین نہیں رکھتا ۔ افغانستان کے سفیر کی بیٹی ہماری بیٹی ہے ، اس حوالہ سے وزارت خارجہ ، وزارت داخلہ کا موقف ہی پورے پاکستان کا موقف ہے ۔
ایک اور سوال کے جواب میں حافظ محمد طاہر محمود اشرفی نے کہا کہ محرم الحرام میں امن وا مان کے قیام کیلئے وزیر اعظم پاکستان عمران خان کی ہدایات پر ہر سطح پر کوششیں شروع ہیں ، عید کے بعد ملک بھر کا دورہ کر رہے ہیں، متحدہ علما بورڈ کے اراکین ، وزیر اعلی پنجاب عثمان بزدار کے تعاون سے صوبہ بھر کا دورہ کریں گے اور پیغام پاکستان کے ضابطہ اخلاق پر مکمل عمل کروایا جائے گا۔
