اسلام آباد (رپورٹنگ آن لائن)وفاقی وزیر مذہبی امور پیر نور الحق قادری نے کہاہے کہ کرونا وبا کی تیسری لہر سے نجات کیلئے تمام طبقات کو احتیاطی تدابیر پر سختی سے عمل کرنا ہو گا،علماء کرام اس موذی وبا سے بچائو اور ایس اور پیز پر موثر عمل درآمد کیلئے حکومتی کوششوں کا ساتھ دیں ۔
جمعرات کو وزیر مذہبی امور پیر نور الحق قادری کی زیر صدارت شیعہ علماء مشاورتی اجلاس ہوا جس میں چیئرمین اسلامی نظریاتی کونسل ، وزارتِ داخلہ اور این سی او سی کے نمائندوں کے علاوہ صوبائی اوقاف لاہور، کراچی اور کوئٹہ سے شیعہ علماء کرام نے ویڈیو لنک کے ذریعے شرکت کی ۔ پیر نور الحق قادری نے کہاکہ کرونا وبا نے تمام انسانی طبقات اور شعبہ ہائے زندگی کو متاثر کیا ہے۔گذشتہ سال علماء کی مشاورت سے جامع احتیاطی تدابیر مرتب کیں، جنہیں دیگر ممالک میں بھی پزیرائی ملی۔
انہوںنے کہاکہ مساجد، امام بارگاہوں اور مذہبی طبقات نے دیگر شعبوں سے بڑھ پر احتیاطی تدابیر پر عمل کیا ۔ وفاقی وزیر نے کہاکہ کرونا وبا کی تیسری لہر سے نجات کیلئے تمام طبقات کو احتیاطی تدابیر پر سختی سے عمل کرنا ہو گا۔ وفاقی وزیر نے کہاکہ کرونا وبا سے بچاو کیلئے سعودی عرب نے تراویح کی رکعات اورنمازیوں کی تعداد کو محدود کر دیا۔ پیر نور الحق قادری نے کہاکہ نجف اشرف ، عراق میں مزارِمولا علی پر حاضری کے ایام اور زائرین کی تعداد کو محدود کیا گیا ہے۔ وفاقی وزیر نے نکہاکہ حضرت ِ علی کی یوم شہادت کے حوالے سے تمام سٹیک ہولڈرز سے مشاورت جاری ہے۔ انہوںنے کہاکہ علماء کرام اس موذی وبا سے بچائو اور ایس اور پیز پر موثر عمل درآمد کیلئے حکومتی کوششوں کا ساتھ دیں ۔ وفاقی وزیر نے کہ اکہ علماء کرام کی تجاویز اور آراء کو وزیر اعظم عمران خان تک پہنچایا جائیگا۔
