کراچی(رپورٹنگ آن لائن)پاکستانی معیشت کیلئے اچھی خبر ہے کہ کرنٹ اکائونٹ میں ماہانہ بنیادوں پر 72 کروڑ 90 لاکھ ڈالر کا سرپلس ریکارڈ کیا گیا۔رپورٹ کے مطابق نومبر میں کرنٹ اکائونٹ میں 72 کروڑ 90 لاکھ ڈالر کا سرپلس ریکارڈ کیا گیا جو جولائی 2013 کے بعد دوسرا سب سے بڑا سرپلس ہے۔
رپورٹ میں بتایا گیا ہے کہ موجودہ مالی سال کے پہلے 5 ماہ کا کرنٹ اکانٹ سرپلس ایک ارب ڈالر کے قریب رہا، غیرقانونی کرنسی کے کاروبار کیخلاف کریک ڈائون سے ترسیلات زر میں اضافہ ہوا۔رپورٹ کے مطابق مالی سال 2025 میں مجموعی ترسیلات زر 35 ارب ڈالر تک پہنچنے کی توقع ہے، کرنٹ اکانٹ سرپلس کا زرِ مبادلہ کی شرح کو مستحکم کرنے اور اسٹیٹ بینک کے زرمبادلہ کے ذخائر میں بہتری میں اہم کردار ہے۔
رپورٹ میں بتایا گیا ہے کہ اسٹیٹ بینک کے ذخائر میں بہتری کے باعث مالی سال 2025 کیلئے 13 ارب ڈالر کے ہدف کا تعین کیا گیا ہے، برآمدات میں ایک ارب ڈالر کا اضافہ ہوا ہے جبکہ خدمات کی برآمدات بھی 3 ارب 27 کروڑ 60 لاکھ ڈالر تک پہنچ گئی ہیں۔مالیاتی ماہرین کے مطابق موجودہ سرپلس شرح مبادلہ کے استحکام اور غیر ملکی سرمایہ کاری میں اضافے کا باعث ہے، ایس آئی ایف سی کا تعاون اور زرمبادلہ کے ذخائر میں اضافہ کرنٹ اکانٹ سرپلس میں بہتری کا مظہر ہے۔
