سیالکوٹ (رپورٹنگ آن لائن)ڈپٹی کمشنر سیالکوٹ کاکہنا ہے کہ سی ٹی آئی گراونڈ میں کبھی بھی سیاسی اجتماع نہیں ہوا اور انتظامیہ نے کرسچن کمیونٹی کی درخواست پر جلسہ کرنے سے روکا۔
ڈی سی سیالکوٹ عمران قریشی نے کہا کہ کرسچن کمیونٹی نے درخواست دی تھی کہ گراونڈ میں مذہبی رسومات ہوتی ہیں، یہ مسیحی برادری کی جگہ ہے، مسیحی برادری نے کہا کہ ہماری جگہ پرسیاسی جماعت جلسہ کررہی ہے جس پر ہم نے بار بار پی ٹی آئی سے درخواست کی کہ جگہ بدل لیں لیکن پی ٹی آئی والے بضد تھے کہ ہمیں مسیحی برادری کی جگہ پر ہی جلسہ کرنا ہے۔
ڈی سی نے کہا کہ کسی کی پرائیویٹ جگہ پرجلسے کے لیے اجازت کی ضرورت ہوتی ہے لہٰذا ہم نے قانون کے مطابق کارروائی کی ہے، عبادت گاہ کے سامنے زبردستی جلسے کی اجازت نہیں دے سکتے، ہم انہیں جلسے کےلیے متبادل جگہ دینے کا تیار ہیں۔
دوسری جانب ڈی پی او سیالکوٹ کاکہنا ہےکہ گراونڈ کو خالی کرادیا گیا ہے، ہائیکورٹ کا حکم ہے کہ گراونڈ میں جلسے کو روکیں جب کہ ڈپٹی کمشنر نے جلسے کی اجازت دینے سے انکار کردیا ہے، ہمارے پاس ہدایات ہیں کہ قانون کے مطابق کارروائی کی جائے۔
