کراچی (رپورٹنگ آن لائن)ایم کیو ایم (پاکستان) کے رہنماءفاروق ستار نے کہا ہے کہ کراچی کی مایوسی کاتماشہ خاموشی سے نہیں دیکھ سکتا،ملک میں قومی سطح کی قیادت کافقدان نظرآرہاہے، شہر قائد میں احساس محرومی ساتویں آسمان سے اوپرچلی گئی،ہم قومی چارٹربرائے استحکام وتعمیروترقی پرکام کرناچاہتے ہیں، اختیارات کوعوام تک نچلی سطح تک لیکرجاناچاہتے ہیں، بلدیاتی نظام کومستحکم کیاجائے۔
سینئر سیاسی رہنما فاروق ستار نے دبئی سے کراچی واپسی پر میڈیا سے گفتگو کرتے ہوئے کہاکہ ڈاکٹرعشرت العباد کی دعوت پردبئی گیاتھا،اسی بہانے میچ دیکھنے کا موقع بھی ملا،عشرت العباد سے پہلے فون پر بھی بات ہوئی تھی، دبئی دورے کا بنیادی مقصد سابق گورنر سندھ ڈاکٹرعشرت العباد سے ملاقات کرنا اورملکی صورتحال خصوصا کراچی کے حالات پربات چیت تھی۔فاروق ستارنے بتایاکہ سابق گورنرسندھ عشرت العباد کی معاملہ فہمی کی پوری دنیاقائل ہے، ان کی سیاسی سوجھ بوجھ سب جانتے ہیں۔
انہوں نے کہاکہ ملک میں قومی سطح کی قیادت کافقدان نظرآرہاہے، کراچی کے عوام میں مایوسی نےتمام ریکارڈ توڑدیے، شہر قائد میں احساس محرومی ساتویں آسمان سے اوپرچلی گئی ،کراچی کے معاملے پرتمام جماعتوں کوجمع کیاجائے، زندگی کے ہرشعبے کے معروف لوگوں کودعوت دیں گے، سرجوڑ کر بیٹھیں گے، ملک کواس صورتحال سے کی سے نکالنا ہے۔
ان کا کہنا تھا کہ سیاسی ومذہبی اکابرین نہیں بلکہ سب شعبوں سے تعلق رکھنے والوں کوساتھ لیکر چلیں ، اندرونی وبیرونی چیلنجز سے نمٹنے کے لئے کراچی کاکردارکیسے ادا ہویہ ایجنڈا ہے،ہم قومی چارٹربرائے استحکام وتعمیروترقی پرکام کرناچاہتے ہیں، اختیارات کوعوام تک نچلی سطح تک لیکرجاناچاہتے ہیں، بلدیاتی نظام کومستحکم کیاجائے۔ان کا مزید کہنا تھا کہ مجھے امید ہے عشرت العباد بھی جلد آئیں گے، ہمیں نئے چہرے نئی ٹیم اور نوجوان قیادت کوآگے لانا ہے، جوانوں کوقومی سیاست میں لانا ہوگا، مستقل حل نکالنا پڑے گا۔
