کراچی(رپورٹنگ آن لائن)تحریک انصاف کے سندھ اسمبلی میں پارلیمانی لیڈر خرم شیر زمان نے کہا ہے کہ کراچی میں بلدیاتی انتخابات کو ملتوی کرنے کی ہر ممکن کوشش کی جارہی ہے۔پریس کانفرنس سے خطاب کرتے ہوئے خرم شیر زمان نے کہا کہ سندھ میں نالائق کا ٹولہ بیٹھا ہوا ہے، اس صوبے کے حالات بہت زیادہ برے ہیں۔انہوں نے کہا کہ سندھ میں گزشتہ 15 سالوں سے پاکستان پیپلزپارٹی کی جو حکومت قائم ہے وہ پوری کوشش کرتی ہے اس صوبے کو موئن جو داڑو میں تبدیل کرنا چاہتی ہے اور مقصد کے لئے بہت محنت بھی کر رہی ہے۔
انہوں نے کہا کہ کراچی سمیت پورے سندھ میں جس طرح روزانہ کی بنیاد پر لوٹ مار کی وارداتیں ہورہی ہیں اور لوگوں کا قتل کیا جارہا ہے اس سے پیپلزپارٹی کا کچھ لینا دینا نہیں ہے لیکن ہم اس صوبے کے حالات کی بہتری کے لئے دعاگو ہیں۔خرم شیر زمان نے کہاکہ ایسا کہیں نہیں دیکھا گیا ہے کہ صوبے کی پولیس کو کہیں اور نگرانی کرنے لئے بھیجا گیا ہو اور پولیس اہلکاروں کا اسلام آباد میں کوئی پرسان حال نہیں۔ ، یہ صرف سندھ میں ہی ایسا ہورہا ہے جس کی وجہ سے بلدیاتی انتخابات ملتوی کئے جارہے ہیں۔انہوں نے کہا کہ چیف جسٹس صاحب کو چاہیئے کہ ان کو بلائیں اور مرغا بنائیں کیونکہ یہ بلدیاتی انتخبات ہونے ہی نہیں دینا چاہتے ہیں کیونکہ انہیں ڈر ہے کہ پی ٹی آئی کا میئر آجائیگا۔انہوں نے کہاکہ متحدہ قومی موومنٹ پاکستان کہتی ہے کہ ہمارا یڈمنسٹریٹر آئیگا تو یہ شہر کیا آپ کے باپ کا ہے جو آپ کا ایڈمنسٹریٹڑ آئیگا، اب اگر آپ کے لندن والے پیر بھی آجائیں تو عوام انہیں مسترد کر دے گی۔
انہوں نے کہا کہ کراچی میں کم عمر بچوں کی اموات ہورہی ہیں، صرف 10 ماہ میں 23 ہزار 90موبائل چھین لیے گئے اور 1792 موٹرسائکلیں چھین لی گئیں ہیں۔انہوں نے بتایا کہ پی ٹی آئی نے کراچی کی خدمت کی ہے اور اسی خدمت کی وجہ سے یہ ساری جماعتیں خوفزدہ ہیں۔پی ٹی آئی رہنما نے کہا کہ پچھلے 28 دنوں سے او پی ڈیز بند ہیں اور جو ڈاکٹرز احتجاج کررہے ہیں ان پر ڈنڈے چلائے جارہے ہیں۔انہوں نے کہاکہ جنہوں نے کہا عمران خان کو گولی نہیں لگی ڈرامے کررہے ہیں کل عمران خان کی زخموں کی ویڈیو سامنے آگئی ہے، ان بیشرموں کو شرم آنی چاہیے ، یہ کس کس سے مقابلہ کریں گے پاکستان کا بچہ بچہ ہر فرد عمران خان ہے۔انہوں نے بتایا کہ عمران خان کے لوگ بغیر اسلحہ کے مقابلہ کرنا جانتے ہیں اور ہمیں مقابلے کیلئے اسلحے کی ضرورت نہیں ہے۔
