اسلام آ باد (رپورٹنگ آن لائن ) پاکستان پیپلزپارٹی کے چیئرمین بلاول بھٹو زرداری نے کراچی میں اتوار 15 جنوری کو منعقد ہونے والے بلدیاتی انتخابات میں پاکستان پیپلزپارٹی کی جیت پر کارکنوں اور ہمدردوں کا شکریہ ادا کرتے ہوئے کہا ہے کہ الیکشن جیتنے والے تمام جیالے بہترین صلاحیتوں کا مظاہرہ کریں۔
اپنے پیغام میں بلاول بھٹو نے کہا کہ بلدیاتی انتخابات کے نتائج سے ثابت ہوگیا کہ شہری اور دیہی سندھ کی واحد بڑی جماعت پیپلز پارٹی ہے، جیالے امیدواروں کو ووٹ دینے والے کراچی اور حیدرآباد کے عوام کا شکریہ ادا کرتے ہیں۔ بلاول بھٹو نے یہ بھی کہا کہ پیپلز پارٹی وفاق کی زنجیر ہے، کراچی میں جیت پورے ملک کی فتح ہے، کراچی اور حیدرآباد کی ترقی کیلئے تمام سیاسی اکائیوں کو مل کر کام کرنا ہوگا۔
پی پی چیئرمین نے تشکر کا اظہار کرتے ہوئے کہا کہ عوام نے سندھ حکومت کی کارکردگی پر اعتماد کا اظہار کیا ہے، کراچی اور حیدرآباد نے نفرت کی سیاست کرنے والوں کو مسترد کردیا۔ دونوں شہروں کے عوام نے نام نہاد مقبول لیڈرز کا پول بھی کھول دیا۔
