سڈنی:( رپورٹنگ آن لائن) آسٹریلوی تحقیق میں ماہرین نے نتیجہ اخذ کیا ہے کہ کام کے دوران معمولی وقفہ بھی کارکردگی میں غیر معمولی اضافے کا سبب بن سکتا ہے۔
ماہرین کا کہنا ہے کہ کام کے دوران دماغ کو صرف 5 منٹ کا وقفہ دینے سے آپ کی کارکردگی میں 50 فیصد سے زیادہ اضافہ ہو جاتا ہے۔ یونیورسٹی آف سڈنی آسٹریلیا میں کیے گئے ایک تجربے میں 72 طلبہ نے خود سے ایک سبق پڑھا اور 2 ذہنی طور پر انتہائی تھکا دینے والے ٹیسٹ دیے۔
وہ طلبہ جنہیں ان آزمائشوں کے درمیان 5 منٹ کا وقفہ لینے کی اجازت تھی، انہوں نے دوسرے ٹیسٹ میں ان طلبہ سے جنہوں نے کوئی وقفہ نہیں لیا تھا، ان سے اوسطاً 57 نمبر زیادہ حاصل کیے۔
وقفہ لینے والے کچھ طلبا نے وقفے کے دوران کچھ نہیں کیا جب کہ دیگر کو قدرتی مناظر کی پُرسکون ویڈیو دِکھائی گئی لیکن دونوں گروہوں نے دوسرے ٹیسٹ میں اپنے ان ساتھیوں سے بہتر کارکردگی دِکھائی جن کو وقفہ نہیں ملا تھا۔
ایجوکیشنل سائیکولوجی کے ایسوسی ایٹ پروفیسر پال گِنز کا کہنا تھا کہ کمرہ جماعت کی طرح دفاتر میں دماغ کو وقفہ دے کر کارکردگی میں واضح طور پر بہتری لائی جاسکتی ہے، وقفہ لینا صرف سوچنے سمجھنے کے لیے نہیں ہوتا، اس کا مقصد اپنی جذباتی بیٹری کو بھی ری چارج کرنا ہوتا ہے، یہ بارآوری کا ایک آسان طریقہ جو ہر کسی کی رسائی میں ہے۔
انہوں نے کہا کہ یہ تحقیق جامعہ کے طلبا پر کی گئی تھی، انہیں اس بات کا یقین ہے کہ تحقیق کے نتائج کا اطلاق کم عمر اور بوڑھے افراد پر کیا جاسکتا ہے۔
