اسلام آ باد (رپورٹنگ آن لائن ) وفاقی وزیر برائے مواصلات مراد سعید نے کہا ہے کہ کامیاب جوان پروگرام سے روزگار کے مواقعوں میں اضافہ ہو رہا ہے،ب تک ملک بھر میں 34 ارب روپے کے قرضہ جات 23 ہزار سے زائد کاروباروں کے لئے منظور ہوچکے ہیں ، خیبرپختونخوا میں 2 ارب روپے مالیت کے قرضہ جات کی منظوری سے صوبے میں کاروبار کو خاطرخواہ بڑھوتری حاصل ہوئی۔
تفصیلات کے مطابق مراد سعید نے کامیاب جوان لون اسکیم سے مستفید ہونے والے خیبر پختونخوا کے کامیاب جوان کی وڈیو ٹویٹ کی ہے جس کے کیپشن میں لکھا ہے کہ کامیاب جوان پروگرام کے توسط سے نہ صرف نوجوانوں کو کاروبار کرنے میں آسانی حاصل ہورہی ہے بلکہ روزگار کے مواقعوں میں بھی اضافہ ہو رہا ہے۔ انہوں نے کہا ہے کہ اب تک ملک بھر میں 34 ارب روپے کے قرضہ جات 23 ہزار سے زائد کاروباروں کے لئے منظور ہوچکے ہیں ، خیبرپختونخوا میں 2 ارب روپے مالیت کے قرضہ جات کی منظوری سے صوبے میں کاروبار کو خاطرخواہ بڑھوتری حاصل ہوئی۔ مراد سعید نے کہا ہے کہ خیبرپختونخوا میں کامیاب جوان اسکلزفار آل پروگرام کے تحت لگ بھگ 64 کروڑ روپے کی لاگت سے 12 ہزار نوجوانوں کو ہنر سکھا کر ان کے لئے روزگار کا حصول آسان بنا دیا گیا ہے۔
وفاقی وزیر برائے مواصلات نے کہا ہے کہ خیبرپختونخوا میں کامیاب جوان پروگرام سے نوجوانوں کو ہنرمند اور خوشحال بنانے کے لئے اب تک مجموعی طور پر2.6 ارب روپے خرچ کیے جا چکے ہیں۔ انہوں نے کہا کہ پارہ چنار سے تعلق رکھنے والے نوجوان مجاہد سنتوری نے قرض حاصل کر کے موٹر سائیکلوں کی ریپئر اور خرید و فروخت کا کاروبار بڑے پیمانے پر بڑھا دیا۔ مراد سعید نے کہا ہے کہ وزیر اعظم عمران خان کے ویژن کے مطابق کامیاب جوان پروگرام پاکستان کے نوجوانوں کو با اختیار بنانے کا ایک انقلابی منصوبہ ہے جس پہ کامیابی سے عملدرآمد جاری ہے۔
پارہ چنار سے تعلق رکھنے والے نوجوان مجاہد سنتوری نے کہا کہ یہ پروگرام وزیراعظم عمران خان کا بہت اچھا اقدام ہے ، کاروبار بڑھانے سے ورکر اور مکینک بھی مزید رکھے ہیں ، مقامی کالج کے طلبہ میری ورکشاپ پہ آکر مکینکل شعبے میں مفت ہنر سیکھ سکتے ہیں۔ انہوں نے کہا کہ قرض ملنے سے ہمارے پاس سہولتیں آگئیں ہیں ، سپئیر پارٹس زیادہ آگئے ہیں ، کامیاب جوان پروگرام سے میرا اور میرے جیسے چھوٹے تاجروں کا بہت بھلا ہوا ہے ، کامیاب جوان پروگرام کی لون اسکیم سے ملک بھر میں کاروبار کو فروغ حاصل ہوا ہے۔
