اسلام آباد (رپورٹنگ آن لائن)وفاقی وزیر برائے آئی ٹی شزا فاطمہ خواجہ نے کہا ہے کہ ڈیجیٹل ترقی کو تیزی سے بڑھائیں گے۔
پاکستان کی پہلی گوگل کروم بْک اسمبلی لائن کی افتتاحی تقریب سے خطاب کرتے ہوئے انہوںنے کروم بْک اسمبلی لائن کے آغاز کو ایک انقلابی قدم قرار دیا۔انہوں نے کہا کہ یہ اقدام ٹیکنالوجی، مینوفیکچرنگ اور تعلیم کو ایک ساتھ لاتا ہے۔شزا فاطمہ نے حکومت کے اس عزم کا اعادہ کیا کہ پاکستان کی ڈیجیٹل ترقی کو تیزی سے آگے بڑھایا جائے گا۔یاد رہے کہ جون 2024 میں گوگل فار ایجوکیشن کے ملکی شراکت دار ٹیک ویلی (ٹیک ویلی)، نیشنل ریڈیو اینڈ ٹیلی کمیونیکیشن کارپوریشن (این آر ٹی سی)،
اور آسٹریلیا کی کمپنی الائیڈ نے خیبر پختونخوا کے ضلع ہری پور میں گوگل کروم بْک اسمبلی لائن قائم کرنے کے منصوبے کا اعلان کیا تھا۔گزشتہ روز ٹیک ویلی کے سربراہ کیون کیلِس کی قیادت میں ایک وفد نے وزیراعلیٰ پنجاب مریم نواز سے لاہور میں ملاقات کی تھی، اور پنجاب میں گوگل کروم بْک مینوفیکچرنگ فیکٹری کے قیام کے لیے مکمل تعاون کی یقین دہانی کرائی تھی، تاکہ ٹیکنالوجی پر مبنی تعلیم اور مقامی آئی ٹی انفرااسٹرکچر کو فروغ دیا جا سکے۔
